Для аператыўнага вырашэння надзённых пытанняў
Працягваецца практыка правядзення па суботах «прамых тэлефонных ліній” прадстаўнікамі абласных і раённых улад. Гэта садзейнічае аператыўнаму вырашэнню хвалюючых грамадзян праблем, інфармаванню іх па актуальных пытаннях.
У мінулую суботу “прамую тэлефонную лінію” правёў старшыня райвыканкама Аляксандр Бутараў. У яе ходзе патэлефанавалі трое жыхароў раёна.
Л.М.Баянкова з аг. Стайкі звярнулася па пытанні афармлення дома ва ўласнасць, ёй у СВК “Калгас “Свярдлова” ў гэтым адмовілі.
Жанчыне было растлумачана, што, паколькі заява была пададзена ад імя мужа, а дагавор найму жылога памяшкання аформлены на заяўніка, ёй неабходна падаць заяву ад свайго імя: як настаўнік, яна ўключана ў спіс асоб, якім перадача жылля ва ўласнасць магчымая.
Т.М.Ільюткіна з в.Лёўкавічы звярнулася да старшыні райвыканкама з просьбай дапамагчы ў вырашэнні наступных пытанняў: спілавання дрэва каля дома №3 па вул.Міру, дзе яна пражывае; рамонту казырка пад’езда дома, грэйдзіравання дарогі. Кіраўніцтву УКП “Жылкамгас” дадзена даручэнне правесці неабходныя работы.
Н.В.Габрусь з в.Казулічы патэлефанавала на “прамую лінію” па пытанні адмаўлення ёй у пастаноўцы на ўлік маючых патрэбу ў паляпшэнні жыллёвых умоў.
Зварот накіраваны на службовую праверку па дадзеным факце.
Увогуле старшыня райвыканкама Аляксандр Бутараў заўсёды адкрыты і даступны для зносін з жыхарамі раёна: грамадзяне маюць магчымасць выказаць свае праблемы, заўвагі, прапановы, прыйшоўшы да яго на прыём у райвыканкам, звярнуўшыся на “прамую тэлефонную лінію”, у ходзе выязных прыёмаў і сустрэч з насельніцтвам па сельсаветах раёна, у працоўных калектывах падчас правядзення Адзіных дзён інфармавання. Ён уважлівы да кожнага грамадзяніна: калі зварот магчыма вырашыць, да гэтага будуць прыкладзены ўсе намаганні. Да такой работы ён абавязвае і кіраўнікоў арганізацый, службаў.
Кіраўнік раёна ўзначаліць нашу дэлегацыю на пятым Усебеларускім народным сходзе: у ліку сямі дэлегатаў Кіраўшчыны ён быў аднадушна выбраны ўдзельнікам народнага веча.
Наталля ХАДАКОВА.
Фота
Максіма МІКЕШЫНА.