— Наша прафесія ўключае ў сябе выкананне поўнага спектра рамонтна-будаўнічых работ. І зараз, нягледзячы на складаныя эканамічныя ўмовы, імкнемся працаваць на карысць людзей: узводзім і рамантуем дамы, аб’екты сацыяльна-культурнага прызначэння, вытворчыя памяшканні. Карацей кажучы, каб трымацца на плаву, бярэмся за любыя работы, якія здольныя выканаць.
Сярод асноўных аб’ектаў зараз — заканчэнне першай чаргі рэканструкцыі вытворчай базы раёна электрасетак філіяла Бабруйскія электрычныя сеткі РУП “Магілёўэнерга”, будаўніцтва 20-кватэрнага жылога дома па вул.Гагарына, дзе мы з’яўляемся генпадрадчыкамі. Значныя аб’ёмы работ выконваем згодна дагавораў з УКП “Жылкамгас”, сярод іх: рамонт жылога дома №83 па вул.Гагарына, дамоў №№5 і 7 па вул. Ядлоўскага ў аг.Жылічы. Зараз працуем над уцяпленнем, тынкуем і афарбоўваем дом №79 па вул. Гагарына. Удзельнічаем у падрыхтоўчых работах да раённага свята працаўнікоў вёскі “Дажынкі-2016”, якое пройдзе ў аг.Барсукі. Тут жа вядзем рэканструкцыю Кургана Славы.
Літаральна нядаўна ў якасці субпадрадчыка завяршылі будаўніча-аддзелачныя работы на ўзвядзенні жылога шматкватэрнага дома ў г.Бабруйску. Рамантавалі некалькі аб’ектаў на тэрыторыі нашага раёна, якія належаць ДЛГУ “Бабруйскі лясгас”. Выконваем і іншыя заяўкі. Напрыклад, сёлета дапамагалі ўстановам адукацыі рыхтавацца да новага навучальнага года: праводзілі рамонтныя работы ў яслях-садку аг.Баравіца, СШ №1 горада і інш.
З надзеяй на лепшае глядзім у будучыню, актыўна прадпрымаем пэўныя захады: удзель-нічаем у праводзімым тэндары на правядзенне другой чаргі рэканструкцыі вытворчай базы раёна электрасетак, гэты аб’ект дазволіць забяспечыць частку нашага калектыву работай на прадстаячы зімовы перыяд. Ёсць некаторыя напрацоўкі і дамоўленасць з нашымі калегамі з г.Клічава аб накіраванні туды кіраўчан для будаўніцтва 20-кватэрнага жылога дома. Добрыя партнёрскія адносіны склаліся ў нас з мінскай фірмай, якая разам з намі займалася будаўніцтвам кацельняў “Кіраўск-Лён” і “СПТВ-220”. На дадзены момант мінчане выйгралі тэндар на будаўніцтва Барысаўскай міні-ТЭЦ і запрашаюць нас у якасці субпадрадчыка працаваць на дадзеным аб’екце. Зараз мы разглядаем прадастаўленыя дакументы, прапануемыя ўмовы работы і аплаты працы, пасля якіх і вырашым, выгадна нам гэта ці не.
Для забеспячэння ўласных патрэб у будаўнічых матэрыялах маем сваю добрую вытворчую базу: раствора-бетонны, арматурны і сталярны цэхі. Матэрыяльна-тэхнічная база знаходзіцца ў добрым стане, у чым немалая заслуга працуючых тут людзей. Укамплектаваны ўсёй неабходнай тэхнікай машынна-трактарны парк.
У магазіне нашага прадпрыемства любы жадаючы можа набыць піламатэрыялы, прадукцыю для правядзення будаўніча-рамонтных работ, драўляныя вырабы, аказваем паслугі па распілоўцы драўніны заказчыка, займаемся вырабам і дастаўкай грамадзянам бетоннага раствору.
Асновай любога прадпрыемства, і нашага ў тым ліку, з’яўляюцца людзі, якія сваёй стараннай і адказнай працай садзейнічаюць паляпшэнню фінансава-эканамічнай стабільнасці прадпрыемства. Калектыў ПМК складаецца са 178 чалавек. Амаль усіх можна ахарактарызаваць толькі са станоўчага боку, як добрасумленных, старанных працаўнікоў. Значная колькасць работнікаў — моладзь. І трэба сказаць, што многія яе прадстаўнікі здольныя на роўных канкурыраваць з больш вопытнымі калегамі па навыках і ўменні. І гэта не можа не радаваць, значыць, мы рыхтуем дастойную змену будаўнікам раёна, і, спадзяюся, яны дастойна працягнуць слаўныя традыцыі прадстаўнікоў самай мірнай і стваральнай прафесіі.
Гонарам нашага прадпрыемства з’яўляюцца людзі, якія прысвяцілі яму шмат гадоў жыцця, сярод іх: матарыст бетоназмяшальнай устаноўкі Леанід Булачкін, тынкоўшчыца Таццяна Лычук, галоўны бухгалтар Ядзвіга Лешуковіч, слесар Васіль Шчыгельскі, сталяры Віктар Ржэуцкі, Мікалай Лазаковіч і Сяргей Каранкевіч, вадзіцель Васіль Міхалап і многія іншыя. Толькі добрых слоў заслугоўвае праца брыгады аддзелачнікаў пад кіраўніцтвам Надзеі Марцючэнка. Дзяўчаты з лёгкасцю спраўляюцца з любым заданнем, робячы ўсё хутка і якасна.
Шэраг нашых работнікаў з нагоды прафесійнага свята адзначаны граматамі і каштоўнымі падарункамі. Так, Ганаровай граматай ДУКПП “Магілёўаблсельбуд” за добрасумленную шматгадовую працу ўзнагароджаны рамшчык 4 разраду Канстанцін Вігура, дыплом Магілёўскага абкама прафсаюза работнікаў АПК атрымаў машыніст аўтакрана Мікалай Стральцоў. Ганаровай граматай райвыканкама адзначана добрасумленная праца электрагазазваршчыка Уладзіміра Хамічэнкі, Падзячнае пісьмо ад райвыканкама атрымае цясляр Аляксандр Максіменка. Аб’яўлены Падзякі і будуць уручаны прэміі райкама прафсаюза работнікаў АПК маляру Ірыне Лук’янавай, тышкоўшчыку Аляксандру Чарнаоку. Падзякі і каштоўныя падарункі раённага камітэта ГА “БРСМ” атрымае наша моладзь: тынкоўшчыкі Аляксандр Еўдакімаў і Анастасія Каранкевіч, муляр Аляксандр Арцёмаў.
Ганаровымі граматамі і каштоўнымі падарункамі ад адміністрацыі і прафкама прадпрыемства адзначаны тынкоўшчыцы Ганна Свіркова і Таццяна Салановіч, вадзіцель аўтобуса Дзмітрый Габрусь, матарыст БЗУ Дзмітрый Грыцкевіч.
Спадзяюся, што ўсё намечанае намі атрымаецца, і гэта дазволіць нашаму ПМК значна палепшыць свае фінансава-эканамічныя паказчыкі і, адпаведна, дабрабыт працуючых тут людзей.
Запісала
Людміла СЯМЁНАВА.
Фота Максіма МІКЕШЫНА.