Кіраўскія мнагаборцы — другія ў вобласці
Другое агульнакаманднае месца заняла зборная каманда раёна на абласных спаборніцтвах па зімнім мнагаборстве “Здароўе”. Гонар Кіраўшчыны пад кіраўніцтвам настаўніка фізічнай культуры і здароўя Паўлавіцкай СШ імя Р.А.Худалеева Валерыя Вароніча абаранялі 12 вучняў гэтай жа школы, а таксама па адным прадстаўніку з Мышкавіцкай і Скрыпліцкай школ. Папярэднічалі абласным спаборніцтвам раённыя. На базе СШ №1 і гімназіі званне мацнейшай аспрэчвалі 11 каманд. У састаў кожнай з іх уваходзілі па адным вучні і адной вучаніцы з 5 па 11 класы. Пераможцы вызначаліся ў кулявой стральбе з пнеўматычнай зброі, скачках у даўжыню з месца, гімнастыцы (падцягванне на перакладзіне — хлопчыкі, адцісканне ад падлогі — дзяўчынкі) і лыжных гонках.
Найбольш высокую ступень падрыхтаванасці паказалі спартсмены з Паўлавіч, якія занялі першае месца і адпаведна склалі касцяк зборнай раёна. Другое месца заняла зборная СШ №1 і замкнулі тройку прызёраў вучні гимназіі.
Па выніках абласных спаборніцтваў складзена зборная Магілёўскай вобласці, у якую ўвайшлі і нашы прадстаўнікі. Гэта Крысціна Лазарава, Максім Няйштэтар і Аліна Ермалаева. Рэспубліканскі фінал адбудзецца сёлета ў Віцебску з 30 студзеня па 1 лютага.