Прыемную навіну прынёс апошні зімовы месяц калектыву ВСУ “Кіраўская раённая ветэрынарная станцыя”: па выніках 2016 года ён прызнаны лепшым у вобласці. Калекцыя іх працоўных дасягненняў папоўнілася Кубкам і дыпломам аддзела ветэрынарыі камітэта па сельскай гаспадарцы і харчаванні Магілёўскага аблвыканкама.

Трэба адзначыць, што райветстанцыя апошнія гады дэманструе зайздросную стабільнасць перамог у абласных спаборніцтвах: з 2011 па 2014 гады і 2016 год — першыя месцы, 2015 год — 2 месца.
У чым жа сакрэт такога поспеху? Па словах галоўнага ветэрынарнага ўрача раёна Мікалая Маслава, у першую чаргу — у зла-джанасці калектыву аднадумцаў, людзей, якія да даручанай справы ставяцца з высокай адказнасцю. Ветспецыялісты разумеюць, што вынік іх працы — гэта дасягненні жывёлагадоўчай галіны ў атрыманні малака і мяса.
Немалаважнай складаемай поспеху з’яўляецца выкананне плана прафілактычных мерапрыемстваў, што, у сваю чаргу, садзейнічае захаванню БРЖ ад невытворчага выбыцця ў сельгасарганізацыях раёна.
Як адзначыў у размове Мікалай Маслаў, асноўная задача, якая сёння стаіць перад жывёлаводамі раёна, у тым ліку і перад ветслужбай — работа над аднаўленнем і захаваннем статка. Для гэтага робіцца ўпор на павышэнне эфектыўнасці штучнага асемянення кароў, зніжэнне колькасці мёртванароджаных цялят, павелічэнне працэнта агульнай захаванасці пагалоўя. І гэта ўдаецца: па выніках мінулага года папаўненне грамадскага статка ідзе з “плюсам”.
Ветэрынарнай службай раёна надаецца ўвага прафілактыцы захворванняў жывёлы — як грамадскага статка, так і з асабістых падвор’яў грамадзян. Правядзенне своечасовых і рэгулярных лячэбна-прафілактычных мерапрыемстваў дазволіла знізіць працэнт захворвання жывёлы інфекцыйнымі і інвазійнымі хваробамі. Сумеснымі намаганнямі вет-службы, кіраўнікоў і спецыялістаў сельгасарганізацый удалося папярэдзіць узнікненне на жывёлагадоўчых аб’ектах небяспечных масавых хвароб БРЖ. Станоўчы факт — адсутнасць у нашым раёне захворванняў жывёлы на такія небяспечныя хваробы, як туберкулёз, бруцылёз, сібірская язва, класічная чума і рожа.
Па словах Мікалая Маслава, немалаважная заслуга ў штогадовых абласных перамогах райветстанцыі — добрасумленная праца вялікага калектыву ветспецыялістаў гаспадарак раёна. Слоў удзячнасці заслугоўваюць галоўны ветурач ААТ “Рассвет імя К.П.Арлоўскага” Ігар Казека, ААТ “Кіраўскае райаграпрамтэхзабеспячэнне” Іван Макаронак, ветурач СГФ “Чыгірынка” Наталля Філіпава і іншыя.
Людміла СЯМЁНАВА.
Фота аўтара.