Педагогі Кіраўшчыны адзначылі Дзень настаўніка
У мінулую нядзелю прафесійнае свята адзначалі педагогі і ўсе, хто звязаны па жыцці з гэтай нялёгкай, але пачэснай працай. Напярэдадні ў дзіцячай школе мастацтваў горада прайшло ўрачыстае мерапрыемства з удзелам кіраўнікоў, членаў педагагічных калектываў устаноў адукацыі.
Той, хто носіць высокае званне настаўніка, бесспрэчна, павінен ісці не толькі ў нагу з часам, але і быць на крок наперад, каб навучыць падрастаючае пакаленне ўсяму таму, што ведае і чым валодае сам. Менавіта такая думка стала лейтматывам мерапрыемства.
Усіх удзельнікаў шчыра віншавала старшыня раённага Савета дэпутатаў Галіна Слабоднікава. Яна адзначыла, што ў нашым раёне працуе шмат педагагічных работнікаў, якім уласцівы самыя лепшыя прафесійныя якасці, што і даказваюць яны сваёй штодзённай працай і адпаведна высокімі дасягненнямі ў падрыхтоўцы вучняў. Галіна Слабоднікава ўручыла прадстаўнікам педагагічнага актыву раёна ўзнагагроды. За шматгадовую і добрасумленную працу, вялікі асабісты ўклад у развіццё і памнажэнне духоўнага і інтэлектуальнага патэнцыялу раёна Ганаровую грамату раённага Савета дэпутатаў атрымаў дырэктар СШ №1 Мікалай Казлоў. Падзячнымі лістамі райсавета дэпутатаў адзначаны загадчык ясляў-садка №4 Таццяна Арцюхова, дырэктар Дабаснянскага НПКДС-СШ Ірына Маслава.
Віншаванні з прафесійным святам прысутным адрасавала намеснік старшыні райвыканкама Таццяна Бяляўская, якая адзначыла, што сваёй самаадданай працай, нястомным творчым пошукам педагогі раёна закладваюць асновы заўтрашняга дня краіны, выхоўваюць сапраўдных патрыётаў дзяржавы. У нашым раёне, падкрэсліла прамоўца, створаны ўсе неабходныя ўмовы для эфектыўнай сістэмы адукацыі. Вынікам сумеснай дзейнасці ўдзельнікаў адукацыйнага працэсу сталі дасягненні ў розных навуковых і выхаваўчых накірунках, якія былі агучаны падчас выступлення. Таццяна Бяляўская ўручыла Ганаровую грамату раённага выканаўчага камітэта за добрасумленную працу ў сістэме адукацыі раёна, прафмайстэрства, значны асабісты ўклад у стварэнне спрыяльных умоў для навучання і выхавання падрастаючага пакалення загадчыку ясляў-садка “Вясёлка” аг.Мышкавічы Жанне Іваніцкай, Падзячны ліст — настаўніку пачатковых класаў СШ №2 імя К.П.Арлоўскага Таццяне Сямёнавай.
Аб дзейнасці ўстаноў адукацыі раёна, людзях, якія плённа працуюць у гэтай сферы і знайшлі ў ёй сваё прызванне, гаварыла начальнік аддзела адукацыі, спорту і турызму райвыканкама Наталля Траццякова, якая таксама прадоўжыла цырымонію ўзнагароджвання педагогаў. Ганаровымі граматамі ўпраўлення адукацыі Магілёўскага аблвыканкама ўзнагароджаны настаўнік матэматыкі СШ №2 імя К.П.Арлоўскага Наталля Яфрэмава, настаўнік інфарматыкі з гэтай жа ўстановы адукацыі Алена Жлобіч, настаўнік біялогіі і хіміі Жыліцкай СШ Марына Церахава, намеснік дырэктара па навучальнай рабоце СШ №1 Лілія Царанок. Шэраг педагогаў раёна ўзнагароджаны Ганаровымі граматамі аддзела адукацыі, спорту і турызму райвыканкама.
Далей былі ўручаны ўзнагароды за спартыўныя дасягненні. У дзявяты раз запар у круглагадовай Спартакіядзе школьнікаў перамагла Паўлавіцкая СШ імя Р.А.Худалеева. Пераходны кубак зноў па праву трымаў у руках настаўнік фізічнай культуры і здароўя Валерый Вароніч.
За дасягнутыя вынікі ў прафсаюзнай рабоце Ганаровыя граматы Магілёўскага абкама прафсаюза работнікаў адукацыі і навукі старшыня райкама прафсаюза Ніна Якімчанка ўручыла старшыням прафкамаў: настаўніку беларускай мовы і літаратуры Барчыцкага НПКДС-СШ Вользе Буднікавай, Ганаровыя граматы райкама прафсаюза — выхавальніку ясляў-садка №2 Наталлі Ганчаронак, настаўніку фізічнай культуры і здароўя СШ №1 Аляксандру Каранкевічу. Райкам прафсаюзаў адзначыў таксама Ганаровымі граматамі за актыўную работу па развіцці фізічнай культуры і спорту і дасягнутыя рэзультаты ў раённай Спартакіядзе работнікаў устаноў адукацыі прафсаюзныя арганізацыі СШ №2 імя К.П.Арлоўскага, СШ №1 і Паўлавіцкай СШ імя Р.А.Худалеева.
Наступны блок святочнага мерапрыемства быў прысвечаны маладым спецыялістам. Сёлета педагагічныя рады папоўнілі 16 цяпер ужо былых выпускнікоў ВНУ. Сімвалічным стала іх вітанне пераможцамі сёлетняга конкурсу педагагічнага майстэрства. Падарункі новым настаўнікам раёна ўручылі выкладчык англійскай мовы СШ №2 імя К.П.Арлоўскага Марына Карніцкая, настаўнік пачатковых класаў СШ №1 Святлана Марозава, выхавальнік ясляў-садка №4 Наталля Хахлова.
Словы ўдзячнасці за шматгадовую плённую працу на ніве асветы адрасаваліся настаўнікам з вялікім стажам. Ад імя раённага Савета ветэранаў педагагічнай працы іх вітала яго старшыня Любоў Лазаковіч.
Шмат цёплых пажаданняў прагучала ў адрас педагогаў са сцэны. Святочны настрой стваралі для прысутных удзельнікі канцэртнай праграмы.
Своеасаблівай рысай напрыканцы святочнага мерапрыемства стала цытата Дзмітрыя Ліхачова: “Калі жыць толькі для сябе, сваімі дробнымі клопатамі аб уласным дабрабыце, то ад пражытага не застанецца і следу. Калі ж жыць для іншых, то яны зберагуць тое, чаму ты служыў, чаму аддаваў сілы”. Гэтыя словы найлепш характарызуюць працу педагога, які вучыць дабрыні і справядлівасці, вучыць быць Чалавекам!..
Аляксандр ХАХЛОЎ.
Фота аўтара.