Працягваем экспрэс-апытанне, як кіраўчане ставяцца да прадстаячай важнай палітычнай падзеі – выбараў Прэзідэнта Рэспублікі Беларусь.

Васіль МАРКЕВІЧ, старшыня раённай арганізацыі РГА “Белая Русь”:
– Выбары Прэзідэнта краіны – важны крок для кожнага беларуса, які неабыякавы да будучыні сваёй дзяржавы.
Для мяне асабіста гэта магчымасць выказаць свае станоўчыя адносіны да праводзімага дзяржавай і яе дзеючым кіраўніком курсу на захаванне стабільнасці, міру ў Беларусі, далейшае дынамічнае развіццё. Кожны з нас павінен уносіць у гэта свой уклад. Раз’яднанасць, сумненні не на карысць нашаму сённяшняму жыццю і будучыні.
Хачу нагадаць, што падчас выбарчай кампаніі да 8 жніўня ўключна працуе грамадская прыёмная нашай арганізацыі па адрасу: г.Кіраўск, вул.Кірава, д.80А (РДК), куды можна прыйсці на асабісты прыём, які ажыццяўляюць актывісты арганізацыі, тут можна накіраваць зварот у пісьмовым або электронным выглядзе. Працуе “гарачая лінія”: тэл маб. +375 29 366-10-57; гарадскі 77-1-25. Графік работы: панядзелак – пятніца – з 10.00 да 13.00; аўторак, чацвер – з 17.00 да 19.00; субота – з 10.00 да 13.00.

Алеся МУХІНА, бухгалтар ПМК №255:
– Я люблю сваю Радзіму і задаволена, што жыву ў нашай міралюбівай краіне. Абавязкова пайду на выбары Прэзідэнта Рэспублікі Беларусь, каб прагаласаваць за стабільнасць, упэўненасць у заўтрашнім дні.
Пажадана, каб кожны азірнуўся назад і ацаніў тое, што зараз ёсць у нашага народа. Я працую ў будаўнічай арганізацыі. Узводзяцца жылыя дамы і аб’екты – значыць, раён развіваецца. Мае дзеці ходзяць у школу і дзіцячы садок, я спакойна магу адпусціць іх гуляць на вуліцу, не баючыся, што з імі нешта здарыцца. Хочацца, каб і ў далейшым так было…