Дэлегаты VI Усебеларускага народнага сходу – сустрэліся з жыхарамі вёскі Чыгірынка

У межах адзінага дня інфармавання старшыня райвыканкама Міхаіл Гулы і старшыня раённага Савета дэпутатаў Галіна Слабоднікава – дэлегаты VI Усебеларускага народнага сходу – сустрэліся з жыхарамі вёскі Чыгірынка ў мясцовым сельскім Доме культуры.
Дэлегаты маштабнага форуму падзяліліся ўражаннямі ад удзелу ў важнай грамадска-палітычнай падзеі, расказалі пра ключавыя аспекты VI Усебеларускага народнага сходу.
Міхаіл Гулы нагадаў лозунг форуму “Адзінства. Развіццё. Незалежнасць” і заўважыў, што абмеркаванне актуальных пытанняў на сходзе было адкрытым і прынцыповым, прасякнутым пачуццём патрыятызму.
Старшыня райвыканкама адзначыў, што ўсе сферы жыццядзейнасці былі закрануты ў дакладзе кіраўніка дзяржавы, выступленнях. Ішла размова пра геапалітыку і ўнутрыпалітычную сітуацыю, эфектыўнасць беларускай мадэлі сацыяльнай дзяржавы, у цэнтры якой – чалавек, пра ўдасканаленне сістэмы адукацыі, аховы здароўя, пенсіённай сістэмы, рост зарплат, дэмаграфічную бяспеку і многае іншае. Асаблівая ўвага была нададзена маладзёжнай палітыцы, удасканаленню патрыятычнага выхавання падрастаючага пакалення.
Удзельнікамі сходу была адобрана Праграма сацыяльна-эканамічнага развіцця Рэспублікі Беларусь на 2021- 2025 гады, галоўная мэта якой – забеспячэнне стабільнасці ў грамадстве, рост дабрабыту грамадзян за кошт мадэрнізацыі эканомікі, нарошчванне сацыяльнага капіталу, стварэнне камфортных умоў для жыцця, працы і самарэалізацыі чалавека.
Прынятая Праграма развіцця краіны, падкрэсліў старшыня райвыканкама, – гэта алгарытм дзеянняў для ўсіх галін народнагаспадарчага комплексу, працоўных калектываў, у тым ліку Кіраўскага раёна.
Міхаіл Гулы адзначыў, што на форуме наш раён быў нагаданы ў дакладзе Кіраўніка дзяржавы ў сувязі з тэмай захавання гісторыка-культурнай спадчыны: у ліку іншых аб’ектаў для выдзялення сродкаў на завяршэнне рэканструкцыі быў названы палацава-паркавы ансамбль у Жылічах. Гэта патрэбна, як было падкрэслена Прэзідэнтам, каб новыя пакаленні беларусаў памяталі і ведалі свае духоўныя вытокі.
І ў другі раз з высокай трыбуны форуму прагучаў наш раён – у выступленні галоўнага інжынера Магілёўскага будаўнічага трэста №12 Дзмітрыя Барысенкі. Ён адзначыў, што іх арганізацыі выпаў вялікі гонар – будаваць у в.Боркі Кіраўскага раёна на месцы буйнейшай па колькасці ахвяр карнай аперацыі супраць мірнага насельніцтва ў Беларусі ў гады Вялікай Айчыннай вайны мемарыяльны комплекс “Памяці спаленых вёсак Магілёўскай вобласці”. І было прыкладзена максімум намаганняў, каб пры наведванні гэтага свяшчэннага месца кожны чалавек змог аддаць даніну памяці трагічна загінуўшым і ўсвядоміць, наколькі вялікая цана, уплачаная за мір, свабоду і незалежнасць краіны.
Адметнасць VI Усебе­ла­рускага народнага сходу ў тым, адзначылі дэлегаты падчас сустрэчы ў Чыгірынцы, што на ім абмяркоўваліся пытанні грамадскага развіцця: пераразмеркаванне паўнамоцтваў паміж галінамі ўлады, наданне Усенароднаму беларускаму сходу канстытуцыйнага статусу, умацаванне мясцовага самакіравання, павышэнне ролі грамадскіх структур у палітычным жыцці.
У сустрэчы прымалі ўдзел дырэктар УКП “Жылкамгас” Юрый Кісялёў, намеснік начальніка РАНС Андрэй Архіпаў, дырэктар СГФ “Чыгірынка” РУП “Беларуснафта-Магілёўаблнафтапрадукт” Ігар Кузняцоў, старшыня Стайкаўскага сельскага Савета дэпутатаў Міхаіл Фрэйберг.
Прадстаўнік РАНС ахарактарызаваў становішча па пажарах і гібелі ад іх людзей у гэтым годзе, назваў асноўныя прычыны вогненных трагедый. Увага была нададзена тэме папярэджвання пажараў пры выкарыстанні пячнога і кацельнага ацяплення.
Улічваючы знаходжанне населенага пункта на беразе Чыгірынскага вадасховішча актуальным было пытанне захавання бяспекі на лёдзе, у тым ліку і падчас зімовай рыбалкі.
Андрэй Архіпаў праінфармаваў аб правядзенні ў рэспубліцы з 20 лютага па 1 сакавіка Адзінага дня бяспекі, аб мэтанакіраваных прафілактычных мерапрыемствах па папярэджванні надзвычайных сітуацый, правапарушэнняў, злачынстваў, навучанню практычным навыкам па забеспячэнні бяспекі жыццядзейнасці, наладжваемых у гэты перыяд.
Напрыканцы сустрэчы ад жыхароў прагучалі пытанні, на іх былі дадзены тлумачэнні, зварот наконт змен у аўтобусным абслугоўванні будзе вырашацца па меры яго вывучэння і абмеркавання з жыхарамі населенага пункта.
Міхаіл Гулы і Галіна Слабоднікава ў гэты дзень таксама правялі сустрэчу з работнікамі райвыканкама, на якой праінфармавалі пра тэматыку пытанняў, абмеркаваных на VI Усебеларускім народным сходзе, і яго рашэннях.
Іншыя дэлегаты форуму ад Кіраўскага раёна таксама выступаюць у сваіх і іншых працоўных калектывах, на сходах падчас справаздачнай кампаніі ў сельгас­арганізацыях.
Падрыхтавала Наталля ХАДАКОВА.
Фота аўтара.

Добавить комментарий

Ваш адрес email не будет опубликован.