Каб вада не стала бядой… На Кіраўшчыне мабільныя групы праводзяць штодзённыя прафілактычныя рэйды на вадаёмах
З павышэннем тэмпературы паветра многія з нас імкнуцца да возера альбо рэчкі, каб уратавацца ад спёкі. Але ж ні ў якім разе нельга забывацца
на тое, што існуюць правілы знаходжання на вадаёмах, і грэбаванне імі можа прывесці да трагедыі. Сумная статыстыка сёлетняга чэрвеня, на жаль, пацвярджае гэты факт.
З пачатку летняга сезону ў раёне стартавала работа, накіраваная на прафілактыку няшчасных выпадкаў на вадзе. Літаральна штодня адказныя службы раёна праводзяць рэйдавыя мерапрыемствы на водных аб’ектах у адпаведнасці з рашэннем райвыканкама №5-29 ад 31.03.2021 года. Створаны мабільныя групы, удзельнікі якіх згодна зацверджанага графіка і маршрутаў патрулявання ажыццяўляюць комплекс прафілактычных мер у адносінах да грамадзян. У іх ліку – выяўленне фактаў распіцця спіртных напіткаў на пляжах і ў грамадскіх месцах, забеспячэнне грамадскага парадку ў месцах масавага адпачынку людзей каля вадаёмаў, правядзенне растлумачальнай работы сярод насельніцтва па пытаннях папярэджвання няшчасных выпадкаў на вадзе.
Адзін з такіх рэйдаў у сераду правялі супрацоўнікі райаддзелаў па надзвычайных сітуацыях, унутраных спраў і рэдакцыі газеты “Кіравец”. У ходзе яго ўдзельнікі наведалі тэрыторыі некалькіх вадаёмаў раёна.
Пачалі з традыцыйна самага масавага месца – пляжа на возеры “Селішча”. Як вядома, гэта адзіны ў раёне вадаём, дзе афіцыйна дазволена купанне. Тут арганізавана пастаяннае дзяжурства матроса-выратавальніка, які ўважліва сочыць за тым, што адбываецца на даручаным яму ўчастку. На момант прыезду мабільнай групы на возеры было шматлюдна. Яно і нядзіўна: тэмпература паветра “пераваліла” за 30°С, і людзі – дарослыя і дзеці – шукалі прахалоду ў вадзе. Парушэнняў правілаў паводзін рэйдавай брыгадай тут выяўлена не было, грамадзяне праводзілі вольны час з захаваннем мер бяспекі. Яшчэ раз аб гэтых мерах шэрагу з іх нагадаў старшы інспектар СПіУГ РАНС Аляксандр Жураўскі і ўручыў адпаведныя памяткі, а ўчастковы інспектар міліцыі Ілья Бойка расказаў аб недапушчэнні распіцця спіртных напіткаў, а таксама аб тым, што трэба паклапаціцца аб захаванасці маёмасці. Дарэчы, гэтую інфармацыю яны паўтарылі і на іншых наведаных аб’ектах, дзе сустрэлі людзей, якія адпачывалі каля вады.
Па некалькі чалавек удзельнікі мабільнай групы сустрэлі каля вадаёмаў у в.Вілы і каля асфальта-бетоннага завода “Сугроб”. Праўда, яны не купаліся, а адпачывалі на беразе. Тым не менш, усім было яшчэ раз нагадана, што купанне ў гэтых вадаёмах забаронена. Дарэчы, аб гэтым асобныя з іх, як ні дзіўна, не ведалі. І ў тым, між іншым, маецца пэўны рэзон, бо каля асобных вадаёмаў адсутнічаюць адпаведныя інфармацыйныя знакі.
Нікога не сустрэлі каля вадаёма ў в.Букіно. І гэта зразумела: вада тут выглядае занадта бруднай, а тэрыторыя вакол зарасла быльняком і кустоўем…
Пры наведванні штучнага вадаёма-копані непадалёк ад СШ №1 быў устаноўлены факт распіцця алкагольных напіткаў. Прычым пад увагу мабільнай групы трапілі тры жанчыны-кіраўчанкі… Яны хоць спрачаліся і імкнуліся даказаць сваю “цвярозасць”, факт адваротнага быў наяве. Парушальніцам на першы раз былі вынесены афіцыйныя папярэджанні. Згодна заканадаўства, калі падобныя факты паўтарацца на працягу года, жанчынам пагражае адміністрацыйная адказнасць і штраф.
Рэйдавыя мерапрыемствы працягваюцца. Хацелася б засяродзіць увагу тых, хто імкнецца адпачыць каля вады, што праводзяцца яны не для таго, каб кагосьці пакараць. Іх мэта, у першую чаргу, – не дапусціць таго, каб вада стала бядой, забрала жыцці і здароўе. Давайце ж не будзем грэбаваць элементарнымі правіламі, захаваем саміх сябе для нашых родных і блізкіх!
Аляксандр ХАХЛОЎ.
Фота аўтара.
Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».