Сельскі сход на тэму бяспекі жыццядзейнасці прайшоў у Чыгірынцы
Сельскі сход, прысвечаны надзённай і актуальнай тэме бяспекі жыццядзейнасці насельніцтва, прайшоў у в.Чыгірынка. Удзел у зацікаўленай размове прынялі першы намеснік начальніка Магілёўскага абласнога ўпраўлення МНС Андрэй Гайсёнак, начальнік РАНС Сяргей Собаль, старшыня Стайкаўскага сельскага Савета дэпутатаў Міхаіл Фрэйберг, дырэктар СГФ “Чыгірынка” Ігар Кузняцоў.
Звяртаючыся да сяльчан, Сяргей Собаль нагадаў колькасць і прычыны адбыўшыхся ў раёне пажараў, у якіх загінулі людзі. Быў агучаны аналіз за 10-гадовы перыяд па сельскіх Саветах дэпутатаў. Алгарытм трагедый — нібыта пад капірку: чалавек п’е, курыць у ложку, засынае і гіне. Прычым усе загінуўшыя былі ў стане моцнага алкагольнага ап’янення, у некаторых доза была “смяротнай”.
Спыніўся прадстаўнік РАНС і на актуальнай падчас летніх школьных канікулаў тэме – бяспекі дзяцей. Ён параіў вяскоўцам ні на хвіліну не пакідаць іх адных дома, забараніць ім знаходзіцца паблізу вадаёмаў без нагляду дарослых, не дазваляць гуляць з запалкамі і гаручымі вадкасцямі.
Сяргей Собаль прывёў некалькі прыкладаў трагічных выпадкаў, якія здарыліся з дзецьмі з-за абыякавасці дарослых. Па яго словах, лепш усяго вучыць малых правілам бяспекі на ўласным прыкладзе.
Увазе прысутных быў прадстаўлены відэафільм аб мерах пажарнай і электрычнай бяспекі.
Андрэй Гайсёнак расказаў насельніцтву пра пажары і надзвычайныя сітуацыі, якія адбыліся сёлета ў Магілёўскай вобласці. Выратавальнік агучыў праблемныя пытанні, звязаныя з парушэннем правілаў пажарнай бяспекі ў быце. Асаблівая ўвага падчас сельскага сходу была нададзена прафілактыцы дзіцячага траўматызму і смерці грамадзян ад знешніх прычын.
Прадстаўнік абласнога ўпраўлення МНС заклікаў мясцовых жыхароў быць асцярожнымі пры наведванні лясных масіваў, бо ў хуткім часе пачнецца ягадна-грыбны сезон, падчас якога выратавальнікам і іншым службам даводзіцца шукаць нямала грамадзян. Асабліва асцярожнымі павінны быць пажылыя людзі, а таксама маючыя хранічныя захворванні.
Усім удзельнікам сельскага сходу ўручылі агітацыйную друкаваную прадукцыю з інфармацыяй па супрацьпажарнай накіраванасці.
Для наведвальнікаў школьнага аздараўляльнага лагера Чыгірынскай СШ супрацоўнікі РАНС правялі прафілактычную гутарку на тэму пажарнай бяспекі. Расказалі рабятам, як неабходна дзейнічаць у выпадку ўзнікнення агню. Хлопчыкі і дзяўчынкі з задавальненнем прымерылі форму пажарнага, з выкарыстаннем спецыяльных прылад паспрабавалі сябе ў якасці выратавальнікаў.
Фота Людмілы СЯМЁНАВАЙ.