Надзейна і бесперабойна забяспечыць спажыўцоў

22 снежня, у самы кароткі светлавы дзень года, сваё прафесійнае свята адзначаюць людзі, ад прафесіяналізму і працы якіх залежыць стабільная дзейнасць не толькі прамысловасці краіны, сельскай гаспадаркі і іншых галін эканомікі, але і сацыяльнай сферы – бальніц, дзіцячых садкоў і школ, камфорт і дабрабыт беларусаў, – энергетыкі. Іх работа патрабуе павышанай адказнасці, пастаяннай увагі, дакладных і граматных дзеянняў пры выкананні пастаўленых задач.
Напярэдадні прафесійнага свята – наша размова з начальнікам раёна электрычных сетак РУП “Магілёўэнерга” філіяла “Бабруйскія электрычныя сеткі” Віталем СУДЗІБОРАМ:
– З галоўнай сваёй задачай – забеспячэннем жыхароў раёна, а таксама прадпрыемстваў і арганізацый жыццёва неабходнымі выгодамі – электраэнергіяй і цяплом – наш калектыў спраўляецца паспяхова. Вядома, на падстанцыях з цягам часу зношваюцца асобныя дэталі, вузлы, зніжаецца іх трываласць, патрабуецца замена на новыя, больш сучасныя і дасканалыя. Для таго, каб падтрымліваць абсталяванне і электрычныя сеткі ў спраўным стане, павышаць надзейнасць энергазабеспячэння спажыўцоў, штогод згодна графіка абслугоўваем лініі электраперадач і падстанцыі.
Так, сёлета адрамантавана больш за 32 км высакавольтных ліній напружаннем 10 кВ, 3,49 км провада заменена на ізаляваны, устаноўлена 14 апор і 189 ізалятараў. Значны аб’ём работ правялі на электрычных сетках напружаннем 0,4 кВ: замянілі 38 апор,
3,78 км провада, 128 уводаў. Было ўстаноўлена 2 пункты секцыяніравання, якія забяспечаць дакладную работу аховы ў выпадку няспраўнасцей. Для больш аператыўнага вываду электрасетак у рамонт устаноўлена 39 стацыянарных зазямляльнікаў. Каб не дапусціць пашкоджанняў электраліній, выдаляем вакол электраперадач кустоўе і хмызняк, праводзім абрэзку дрэў.
Значны аб’ём работ ажыццявілі на тэрыторыі горада: замянілі 2 кабельных участкі 10 кВ і капітальна адрамантавалі 48 трансфарматарных падстанцый.
У мэтах павышэння надзейнасці электразабеспячэння жыхароў раёна рамонтныя і абслугоўваючыя работы былі праведзены, акрамя райцэнтра, у шэрагу населеных пунктаў: Пацавай Слабадзе, Чыгірынцы, Полькавічах, Морхавічах, Сялібе і іншых.
У бягучым годзе выкананы другі этап аўтаматызацыі раёна электрасетак. Была праведзена ўстаноўка кіруючых вакуумных выключальнікаў у ячэйках 10 кВ у сямі трансфарматарных падстанцыях. Гэта дазволіць нам значна павысіць якасць аказання паслуг. Так, зараз дыспетчары могуць аператыўна выключыць аварыйны ўчастак электралініі і пераключыць яе на рэзервовую падачу электраэнергіі. Гэта значыць, што нават у выпадку няштатнай сітуацыі нашы спажыўцы ўжо праз некалькі хвілін будуць атрымліваць энергію ў свае дамы і кватэры. Работу ў дадзеным накірунку будзем працягваць і далей.
За бягучы год намі падключана 82 электраўстаноўкі для ацяплення і гарачага водазабеспячэння жылых дамоў, устаноўлена 1729 шкафоў уліку, 12564 прыбораў для ўліку затрачанай электраэнергіі.
Калектыў раёна электрычных сетак – гэта 65 кваліфікаваных спецыялістаў, працу кожнага з якіх складана пераацаніць. Ад іх нябачнай на першы погляд работы залежыць жыццядзейнасць горада і сельскіх населеных пунктаў Кіраўшчыны.
РЭС лічыцца прадпрыемствам павышанай небяспекі, таму абавязковыя якасці работнікаў – гэта адказнасць, строгая дысцыпліна, высокі прафесійны ўзровень і тэхнічная падрыхтоўка.
Як і ў любой сферы, галоўнае для нас – кадры. Калі побач калегі-аднадумцы, людзі, хварэючыя душой за даручаную справу, выкананне любых пастаўленых задач будзе па сілах.
Шчыра кажучы, нашаму калектыву ў гэтым сэнсе пашанцавала: за плячыма многіх рэсаўцаў не адзін дзясятак год добрасумленнай працы. У ліку лепшых работнікаў – вядучы інжынер Дзмітрый Мурашка, электраманцёр аператыўна-выязной брыгады Андрэй Лазюк, электраманцёр Яўген Стэльмах, механік Андрэй Пацыенак, слесар па рамонце гідратурбіннага абсталявання Чыгірынскай ГЭС Максім Грачанік.
Шэраг нашых працаўнікоў да прафесійнага свята будзе адзначаны рэспубліканскімі і абласнымі ўзнагародамі. Так, за дасягненне высокіх паказчыкаў у рабоце, надзейнае і бесперабойнае забеспячэнне народнай гаспадаркі і насельніцтва энерганосьбітамі і ў сувязі з 90-годдзем беларускай энергасістэмы Ганаровым знакам ДВА электраэнергетыкі “Белэнерга” адзначаны слесар па рамонце гідратурбіннага абсталявання 5 разрада Чыгірынскай ГЭС Уладзімір Садоўскі. Падзяка ДВА “Белэнерга” аб’яўлена майстру Валерыю Прымаку.
Ганаровай граматы РУП электраэнергетыкі “Магілёўэнерга” ўдастоена кантралёр энергазабяспечваючай арганізацыі 4 разрада Святлана Савельева. На Дошку Гонару філіяла “Бабруйскія электрычныя сеткі” занесены партрэт электраманцёра аператыўна-выязной брыгады 5 разрада Аляксандра Шубарава. Ганаровай граматы філіяла “Бабруйскія электрычныя сеткі” ўдастоены вадзіцель аўтамабіля 5 разрада Сяргей Сідарэнка, Падзякі – трактарыст 5 разрада Сяргей Рабаконь.
Энергасістэма Беларусі з кожным годам развіваецца і рухаецца наперад. Пашыраюцца магчымасці выкарыстання электраэнергіі як на вытворчасці, так і ў быце. Для энергетыкаў важна быць нераўнадушнымі да праблем іншых: любы збой у сетцы парушае камфорт людзей і прывычны лад жыцця, псуе іх настрой. Мы імкнемся мінімізаваць нязручнасці для нашых кліентаў, хутка і якасна ліквідаваць перабоі ў энергасістэме. І лепшая ўзнагарода для нас – адсутнасць скаргаў.
Падрыхтавала Людміла СЯМЁНАВА.
Фота Максіма МІКЕШЫНА.