Год мінулы – год наступны
Напярэдадні Новага года рэдакцыя правяла традыцыйнае бліц-апытанне сярод жыхароў нашага раёна і прапанавала адказаць, чым запомніўся адыходзячы год і якія планы на 2022 год.
Васіль МАРКЕВІЧ, старшыня раённай арганізацыі РГА “Белая Русь”:
– Адыходзячы год запомніўся яркімі падзеямі, знакавымі мерапрыемствамі ў межах абвешчанага ў нашай краіне Года народнага адзінства. Мы, беларусы, паказалі, наколькі мы з’яднаныя ў добрых справах і пачынаннях у імя працвітання нашай Айчыны, міру і згоды на зямлі.
Напрыканцы года, 27 снежня, вынесены на ўсенароднае абмеркаванне праект змяненняў і дапаўненняў Канстытуцыі Рэспублікі Беларусь. Кожнаму беларусу прадастаўляецца права ўнесці свой уклад у дзяржаўнае будаўніцтва, выказаць наконт гэтага меркаванні, прапановы.
Наша раённая арганізацыя РГА “Белая Русь” актыўна ўключылася ў абмеркаванне праекта, актывізуецца работа грамадскай прыёмнай, дзе таксама будуць акумулявацца водгукі аб змяненнях і дапаўненнях, унесеных у новую рэдакцыю Канстытуцыі.
Адчуваецца, что людзі неабыякавыя, іх хвалююць змены ў грамадстве. Асноўны закон дзяржавы – лёсавызначальны дакумент, па якім нам прадстаіць жыць. І я ўпэўнены ў тым, што жыхары нашага раёна прымуць актыўны ўдзел у абмеркаванні праекта, і ў прадстаячым рэферэндуме па Канстытуцыі.
А напярэдадні старту ў 2022 год жадаю землякам дабрабыту, здароўя, быць адзінымі ў карысных справах і мець актыўную жыццёвую пазіцыю.
Вікторыя КАРАНЧУКОВА, ураджэнка аг.Жылічы, студэнтка 3-га курса міжнароднага універсітэта “МИТСО”:
– Для мяне адыходзячы год быў вельмі насычаным на незабыўныя моманты. Галоўны – нядаўні ўдзел у Рэспубліканскім навагоднім балі, на якім прысутнічаў Прэзідэнт Рэспублікі Беларусь Аляксандр Рыгоравіч Лукашэнка.
Навагодняе дзейства адбылося ў Палацы Незалежнасці, куды запрасілі 337 маладых людзей: выдатнікаў вучобы, пераможцаў розных конкурсаў і алімпіяд, прызёраў творчых і спартыўных спаборніцтваў, актывістаў грамадскага жыцця і валанцёрскага руху.
З прывітальным словам да ўдзельнікаў Рэспубліканскага навагодняга балю звярнуўся Кіраўнік нашай дзяржавы. Аляксандр Рыгоравіч нагадаў, што гэтае свята, якое праходзіць у Беларусі чацвёрты год запар – адраджэнне гістарычнай традыцыі, фарміруючай сучаснае аблічча нашай маладой суверэннай дзяржавы.
Прыемна было пачуць, што адбыўшаеся свята – падарунак для маладых людзей, якія заслужылі прыняць у ім удзел сваімі поспехамі ў вучобе, творчасці, грамадскім жыцці. Словы ўдзячнасці прагучалі і ў адрас бацькоў усіх рабят, настаўнікаў, якія дапамаглі раскрыць таленты маладых людзей, выхавалі іх патрыётамі сваёй краіны.
У прыгожых класічных танцах разам з маладым пакаленнем вальсіравалі і Кіраўнік нашай краіны, і высокапастаўленыя службовыя асобы.
Перад маімі вачамі і дагэтуль стаіць карціна свята, нібыта з балю XVIII века: жывы гук аркестра, дзяўчыны ў прыгожых сукенках і кавалеры ў строгіх касцюмах, танцмайстар, які запрашае на вальс…
Прайшлі майстар-класы па бальных танцах, выступілі беларускія артысты.
Упэўнена, што ў надыходзячым 2022 годзе мяне чакае шмат цікавых падзей і новых адкрыццяў. Планую больш актыўна займацца навуковай дзейнасцю, прадоўжыць удзельнічаць у міжнародных конкурсах і алімпіядах.
Хацелася б пажадаць усім жыхарам раёна, каб новы год стаў часам дасягненняў і перамог, каб наша Кіраўшчына развівалася, а моладзь пасля вучобы вярталася сюды жыць і працаваць.
Валерый ШЧЭРБІЧ, вадзіцель ААТ “Рассвет імя К.П.Арлоўскага”:
– Самым памятным момантам адыходзячага 2021 года стала ўручэнне мне ў ліку іншых прадстаўнікоў розных сфер дзейнасці высокай дзяржаўнай узнагароды – медаля “За працоўныя заслугі”. Урачыстая цырымонія адбылася ў Палацы Рэспублікі.
Паспяховым адыходзячы год стаў для раслінаводчай галіны ААТ “Рассвет імя К.П.Арлоўскага”: наша сельгаставарыства атрымала найбольшы ў раёне валавы збор збожжавых і зернебабовых. Дасягнутыя вынікі дазволілі “Рассвету” стаць пераможцам раённага спаборніцтва за дасягненне высокага ўраджаю збожжавых і зернебабовых раслін за 2021 год. Прыемна, што ў гэтым ёсць часцінка і маёй стараннай працы.
Радасна, што нямала працаўнікоў нашай гаспадаркі былі ўшанаваны на абласным фестывалі-кірмашы працаўнікоў вёскі “Дажынкі-2021”.
Хочацца спадзявацца, што надыходзячы 2022 год дазволіць аграрнаму сектару раёна, у якім працуюць старанныя, адказныя і добрасумленныя людзі, выйсці на перадавыя пазіцыі, каб хлебныя нівы радавалі намалотамі, а жывёлагадоўчая галіна – надоямі і прывагамі. У гэтым – харчовая бяспека нашай краіны, дабрабыт беларусаў, багацце на нашых сталах. Калі мы будзем разам, калі кожны будзе адказна працаваць на сваім рабочым месцы, мы здольныя супрацьстаяць любым негатыўным праявам.