У першую нядзелю снежня сваё прафесійнае свята адзначаюць усе, хто звязаны з юрыспрудэнцыяй. Гэтая дата аб’ядноўвае спецыялістаў, якія працуюць у самых розных сферах дзейнасці. Юрысконсульты і правазнаўцы, работнікі органаў правапарадку і суддзі, натарыусы, пракуроры і адвакаты – усе яны служаць літары закона, абароне канстытуцыйых правоў і свабод нашых грамадзян, развіццю культуры прававых зносін, павышэнню ўзроўня прававой інфармацыі.

Быць юрыстам – вялікі гонар і, у той жа час, вялізная адказнасць, бо гэтая прафесія патрабуе асаблівых маральных, этычных якасцей. Прававую абарону забяспечваюць людзі, адданыя абранай справе, валодаючыя трывалымі ведамі, глыбокай чалавечай прыстойнасцю і сумленнасцю.

Менавіта такія якасці ўласцівы супрацоўнікам юрыдычнага аддзела ААТ “Рассвет імя К.П.Арлоўскага”. Узначальвае яго граматны і кампетэнтны спецыяліст Васіль Улашчанка. Сёлета, да слова, ён адзначыў свой прафесійны юбілей: на гэтай пасадзе працуе 10 год. Адпаведную адукацыю Васіль Анатольевіч атрымаў у свой час, паспяхова скончыўшы юрыдычны факультэт Беларускай дзяржаўнай сельгасакадэміі. За дзесяцігоддзе сваёй дзейнасці ў “Рассвеце” спецыяліст паспеў заваяваць давер у кіраўніцтва і калег сваімі прафесійнымі і чалавечымі якасцямі: стаўленнем да справы, глыбокім веданнем яе тонкасцей і аспектаў, а таксама щважлівасцю, тактоўнасцю і ветлівасцю, што немалаважна ў рабоце.

У тандэме з вядучым юрысконсультам старанна працуе Анжэла Пішчаліна. У юрыдычным аддзеле акцыянернага таварыства яна амаль столькі ж, як і калега, – 9 год, а дагэтуль папярэдне скончыла Маскоўскі юрыдычны інстытут. Гэта таксама дасведчаны спецыяліст, які дакладна валодае спецыфікай работы ў юрыспрудэнцыі.

Як вядома, ААТ “Рассвет імя К.П.Арлоўскага” – сельгасарганізацыя шматпрофільная. А таму работа юрыстаў уключае ў сябе шырокі спектр накірункаў, і важнасць яе не выклікае сумненняў. У прыватнасці, спецыялісты аддзела распрацоўваюць дакументы прававога характару, удзельнічаюць у ажыццяўленні мерапрыемстваў па ўмацаванні дагаворнай, фінансавай і працоўнай дысцыпліны, забеспячэнні захаванасці маёмасці гаспадаркі. У адпаведнасці з устаноўленым парадкам яны афармляюць матэрыялы аб прыцягненні работнікаў, калі ў гэтым ёсць неабходнасць, да дысцыплінарнай і матэрыяльнай адказнасці. Прымаюць удзел у рабоце па заключэнні гаспадарчых дагавораў, правядзенні іх прававой экспертызы, распрацоўцы ўмоў калектыўных дагавораў і галіновых, тарыфных пагадненняў, а таксама разглядзе пытанняў аб дэбіторскай і крэдыторскай запазычанасці.

У кампетэнцыі спецыялістаў-юрыстаў – інфармаванне работнікаў таварыства аб дзеючым заканадаўстве, азнаямленні пасадавых асоб з нарматыўнымі прававымі актамі, якія адносяцца да іх дзейнасці. Важны момант – кансультаванне работнікаў гаспадаркі па арганізацыйна-прававых і іншых юрыдычных пытаннях, у тым ліку ў вобласці аховы працы, а таксама кантроль за ажыццяўленнем заканадаўства аб працы.

Гэта далёка не поўны пералік разнастайных накірункаў у рабоце супрацоўнікаў юрыдычнага адзела “Рассвета”. І, як адзначае кіраўніцтва таварыства, спраўляюцца яны са штодзённымі задачамі выдатна. Высокакваліфікаваныя спецыялісты, як падкрэслілі самі, любяць сваю справу, а таму са значнай ступенню адказнасці ставяцца да ўсіх даручэнняў.

Аляксандр ХАХЛОЎ.

Фота аўтара.