У цяпліцах “Рассвета” – веснавы настрой
Кожны вечар неба ў раёне аг.Мышкавічы пачынае зіхацець ярка-ружовым колерам, а прычына гэтаму даволі простая – так агароднінаводы цяплічнага камбіната ААТ “Рассвет імя К.П.Арлоўскага” з дапамогай штучнай падсветкі кампенсуюць расадзе агуркоў і памідораў, якая высаджана ў цяпліцах, недастатковую колькасць сонечнага святла.
Пакуль за вокнамі дуюць вятры і ляжаць гурбы снегу, у цяпліцах “Рассвета” пануюць цеплыня, прыгажосць і такое неабходнае для развіцця і росту раслін святло.
Як паведаміла рэдакцыі галоўны тэхнолаг цяплічнага камбіната Марыя Бяляўская, першыя агуркі пакупнікі рассветаўскай прадукцыі змогуць пакаштаваць ужо ў лютым, бліжэй да Дня абаронцаў Айчыны, а вось духмяныя салодкія памідоры давядзецца пачакаць да красавіка.
Па словах Марыі Бяляўскай, 31 снежня мінулага года яны пасеялі першае насенне агуркоў гатункаў галандскай селекцыі “яні” і “б’ёрн”. Расліны пад пільным доглядам агароднінаводаў дружна ўзышлі і набралі моц. У пачатку бягучага тыдня агуркі “яні” былі высаджаны ў субстрат з мінеральнай ваты на плошчы 2 га, у пятніцу цяплічніцы яшчэ на 2 га размесцяць расаду кароткіх калючых агуркоў “б’ёрн”. Дарэчы, гэтыя зелянцы карыстаюцца асаблівай папулярнасцю ў пакупнікоў за свае цудоўныя смакавыя якасці.
Насенне таматаў рассветаўцы пасеялі яшчэ ў сярэдзіне снежня мінулага года. Зараз яны ўжо высаджаны на пастаяннае месца і занялі плошчу ў 3 га. Зялёныя расліны гатункаў “рамінда” слівападобная і “алтадэнія” баўнаплодная добра развіваюцца і хутка ўздымаюцца ўверх, некаторыя расліны за час плоданашэння дасягнуць вышыні ў 7 метраў і больш. Таматы таксама вырошчваюцца ў субстраце з мінеральнай ваты. Пры гэтым да кожнай расліны падведзены кропельніцы, якія падаюць парасткам спажыўныя рэчывы і ваду ў неабходнай колькасці і ў вызначаны час. Дзякуючы гэтай тэхналогіі мясцовыя цяплічніцы збіраюць ураджай памідораў ажно да лістапада.
Адным з галоўных фактараў атрымання багатага ўраджаю, адзначыла Марыя Бяляўская, з’яўляюцца надзейныя і адказныя кадры, якія заняты вырочшваннем і доглядам раслін. У ліку вопытных і адказных агароднінаводаў – Валянціна Цішкова, Раіса Елісеенка і Кацярына Сакабіцкая, якія зараз задейнічаны на таматах, на агурках – Наталля Андрэева і Марына Гарачкова.
Людміла СЯМЁНАВА.
Фота Максіма МІКЕШЫНА.