Усталяваўшаеся цёплае і сонечнае надвор’е дазволіла аграрыям раёна актывізаваць работы па нарыхтоўцы кармоў з траў першага ўкосу. Ажыўлена зараз на сенажацях КСУП “Ніва-Барсукі”, у чым карэспандэнты “раёнкі” пераканаліся, пабываўшы ўчора на мясцовых палетках, што размешчаны паблізу в.Капусцина. Нарыхтоўка кармоў тут ідзе практычна бесперапынна: два КВК і КЗР імгненна напаўняюць кузавы і прычэпы 10 адзінак тэхнікі на адвозцы, а невялікая адлегласць ад месца закладкі сянажнай масы дазваляе не прастойваць кормакамбайнам.

Трэба адзначыць, што мясцовыя раслінаводы па-гаспадарску паставіліся да догляду за травастоямі: падкормленыя ўгнаеннямі і ад значнай вільготнасці яны раскусціліся, а з цяплом пусціліся ў рост. Радуюць вока пакінутыя ўслед за касілкай высокія густыя валкі духмянай свежаскошанай травы.

Як адзначыў галоўны аграном сельгаспрадпрыемства Сяргей Сіўчыкаў, дастатковая наяўнасць корманарыхтоўчай тэхнікі і надзейныя механізатарскія кадры дазваляюць весці касавіцу аператыўна. Зараз работы ідуць у в.Капусціна, дзе размешчана поле са свірэпіцай плошчай каля 80 га. А ўсяго яшчэ чакаюць свайго часу травы больш чым на 1500 га. Уборка такіх плошчаў, упэўнены галоўны аграном, дазволіць стварыць трывалую кармавую базу для будучых важкіх надояў малака і прыбавак у вазе БРЖ.Па словах спецыяліста, травы сёлета радуюць гушчынёй і ўраджайнасцю, якая складае не менш за 120 ц/га. І гэта пакуль толькі першыя спробы: уборка зялёнай масы на лепшых палетках – яшчэ наперадзе. Галоўнае, на думку спецыяліста, не прамарудзіць спрыяльны для траў час, каб назапасіць карысныя кармы для жывёлагадоўлі.

Па стане на ўчарашнюю раніцу ніваўцы скасілі травы на 280 га і нарыхтавалі 2570 т сянажнай масы, якая была затрамбавана ў траншэю паблізу МТК “Капусціна”. Для таго, каб корм быў збалансаваны і пажыўны, для закладкі выкарыстоўвалі жыта зялёнаўкоснае, свірэпіцу, люцэрну. Першую яму тут закрылі як таго патрабуе тэхналогія – за 3 дні. Усяго ж падрыхтавалі да прыёму “зялёнкі” 6 траншэй.
Увесь светлавы дзень на палетках сельгаспрадпрыемства не змаўкае гул тэхнікі: корманарыўтоўшчыкі імкнуцца навярстаць упушчаны з-за праліўных дажджоў час.
Першымі сёлета вывелі на сенажаці трактары з касілкамі Мікалай Таранаў, Сяргей Ярыгін і Генадзь Макаронак. Дарэчы, апошні з механізатараў працуе на 9-мятровым агрэгаце, які дазваляе пры кашэнні траў адразу зграбаць іх у валкі, такім чынам эканомяцца ГЗМ і адпадае неабходнасць пускаць услед граблі. З пастаўленай задачай механізатары спраўляюцца выдатна, бо для кожнага з іх касавіца – справа звыклая.
Праз 2-3 дні пасля касьбы траў пры сонечным надвор’і на палі выходзяць КВК і КЗР, за рулём якіх – Аляксандр Еўдакімаў, Алег Стальмакоў і Яўген Манько. Працаўнікі яны вопытныя, не першы год шчыруюць на корманарыхтоўцы, своечасова і дасканала падрыхтаваная тэхніка працуе без збояў: валок за валком падбіраецца і здрабняецца, правяленая маса апрацоўваецца кансервантам і загружаецца ў кузавы аўтамабіляў і прычэпы трактароў. Хутка дастаўляюць зялёную масу да сянажных траншэй і на корм жывёле Васіль Марозаў, Іван Скрыпуноў, Уладзімір Ермалаеў, Дзмітрый Мендзелеў, Мікалай Сурын, Міхаіл Белаглазаў, Рыгор Прусянкоў, Андрэй Свірко, Раман Канановіч і Аляксандр Бяляўскі.

Кантралююць працэс закладкі сянажнай масы адказныя спецыялісты, вя­дзецца ўся неабходная дакументацыя. У свой час сянажныя траншэі былі своечасова падрыхтаваны для прыёму зялёнай масы: ачышчаны ад рэшткаў кармоў, пабелены, пад’езды высланы саломай. На трамбоўцы сенажу задзейнічаны Алег Сакабіцкі і Аляксандр Няфёдаў, абодва ў гаспадарцы на добрым рахунку, працавітыя і адказныя. Трамбоўка сянажнай масы вядзецца кругласутачна.
На вызваленыя ад аднагадовых траў палеткі выходзіць тэхніка для ўнясення арганікі, узворвання і сяўбы культур з кароткім тэрмінам выспявання. Такім чынам, за адзін сезон ніваўцы паспяваюць з кожнага ўчастка атрымаць па некалькі ўраджаяў траў. Таму і маюць пастаянны паўтарагадовы кармавы запас для грамадскага статка.
Паралельна ў гаспадарцы вядзецца чарговая апрацоўка азімых збожжавых ад хвароб і шкоднікаў. Гэты ўчастак даверылі Аляксандру Петранкову і Аляксандру Алёхну, ваду падвозяць Аляксандр Рымараў і Міхаіл Рымараў. Арганіку ўносяць Юрый Сямёнаў, Аляксандр Якаўлеў і Аляксей Сямёнаў.
З першымі промнямі сонца ў гаспадарцы пачынаюцца корманарыхтоўчыя работы, якія працягваюцца ўвесь светлавы дзень. У сваю чаргу, і кіраўніцтва сельгаспрадпрыемства паклапацілася аб стварэнні належных умоў працы для механізатараў і вадзіцеляў: усе забеспячаны гарачым харчаваннем – абеды і вячэры дастаўляюцца прама на палеткі. Добрым стымулам для падтрымання высокага тэмпу і якасці работ сталі распрацаваныя ўмовы аплаты працы і прэміравання. Усё разам гэта дае ўпэўненасць, што прадстаячую зімоўку грамадскі статак КСУП “Ніва-Барсукі” сустрэне з важкім запасам кармоў выдатнай якасці.
Людміла СЯМЁНАВА.
Фота Максіма МІКЕШЫНА.
На верхнім фота: на адвозцы сянажнай масы задзейнічаны механізатар Мікалай белаглазаў, на падборы і здрабненні траў на КВК-800 – Аляксандр Еўдакімаў.