“Зялёнае жніво” ў КСУП “Чырвоны баец”: насуперак спякоце аграрыі – у рабоце
У раёне актыўнымі тэмпамі працягваецца кампанія па нарыхтоўцы травяністых кармоў для зімова-стойлавага перыяду грамадскага пагалоўя буйной рагатай жывёлы. У асобных сельгасарганізацыях – КСУП “Ніва-Барсукі”, “Жылічы”, СГФ “Чыгірынка” – аграрыі завяршылі “зялёнае жніво” першым укосам. У большасці гаспадарак гэты працэс – на завяршаючай стадыі.
Учора, калі мы наведалі палеткі КСУП “Чырвоны баец”, травы тут былі скошаны на 110 га, што складае 84% ад запланаванага на першым этапе. З 818 га ўсё скошанае сабрана. У гаспадарцы імкнуцца не марудзіць ні з тэмпамі касьбы, ні з ўборкай. Распаленае сонца штодня даганяе слупок градусніка не менш, як на 30 са знакам “плюс”. Пры адсутнасці дожджыкаў і такой спёцы трава ў скошаных валках імгненна сохне, і яе неабходна як мага хутчэй закласці ў траншэі.
Менавіта за гэтым заняткам мы і сустрэлі цэлы атрад мясцовых механізатараў непадалёк ад Дваранінавіч, дзе быў наладжаны корманарыхтоўчы канвеер. Балазе, травяныя палі размешчаны дастаткова блізка ад малочна-таварнага комплексу і адпаведна ад сянажных траншэй, якія запаўняюцца зялёнай масай. Таму трактары і аўтасамазвалы хутка дастаўляюць яе сюды.
Першымі на ўбіраемым палетку папрацавалі касцы: з дапамогай дзвюх навясных касілак травы склалі ў роўныя валкі Яўген Кандраценка і Віктар Аляксееў. Падварушвае скошанае з дапамогай граблей механізатар Сяргей Бяляўскі.
Затым у справу ўступаюць на камбайнах КВК Ігар Пацыенак і Віталь Бяляўскі. У апошняга, праўда, на момант нашага прыезду здарылася нечаканая паломка, і ён мусіў яе выпраўляць. Таму часова падбіраць і здрабраць скошаную масу даводзілася на адным кормакамбайне. Аднак яго рулявы імкліва напаўняў прычэпы ПІМ і кузавы МАЗаў. На адвозцы задзейнічаны мясцовыя механізатары Дзмітрый Аляксееў, Валерый Дырыкаў, вадзіцель Юрый Кітоў. Штодня прыязджаюць на дапамогу ім па 2-3 аўтамашыны з “Аўтапарка-14”, з якім “Чырвоны баец” заключыў дагавор на прадастаўленне тэхнікі для перавозкі зялёнай масы і арганікі.
З захаваннем неабходных тэхналагічных нормаў вядзецца працэс закладкі масы ў сянажныя траншэі. Прычым гэта адбываецца круглыя суткі: удзень на аб’екце заняты Юрый Манетаў на К-700 і Аляксандр Сенчукоў – на пагрузчыку “Маніту”, а ўначы іх падмяняе Аляксей Масюковіч. Тут жа, на траншэях, ход работ, якасць масы пастаянна кантралююць адказныя асобы – спецыялісты агратэхнічнай і зааветэрынарнай службаў.
Дарэчы, што датычыцца траў, якія ўваходзяць у зялёную сянажную масу, то, як адзначыў дырэктар сельгасарганізацыі Сяргей Лянкевіч, травастой сёлета выдаўся добры – лепшы, чым летась, хоць і з-за халаднаватага надвор’я вымушаны былі распачаць уборку крыху пазней. Але зернебабовая сумесь выйшла вельмі густая, сакавітая і радавала вока спецыялістаў і радавых механізатараў. Увайшлі ў яе люцэрна, канюшына, фісталолеум з цімафееўкай. Так што, ёсць падставы разлічваць на трывалы запас кармоў. Сенажу ўжо закладзена ў траншэі 6100 т – прыкладна палова ад запланаванага, маецца таксама 777 т сіласу з 8600 т – пэўную частку зялёнай масы з-за павышанай вільготнасці ў пачатку корманарыхтоўчага перыяду давялося закансерваваць менавіта такім чынам.
Акрамя таго працягваецца ў гаспадарцы і нарыхтоўка сена. Яго назапашана 100 т з планавых 590 т. Сохне скошаная трава вельмі хутка, і яе скатваюць у рулоны з дапамогай прэс-падборшчыка. На гэтым участку старанна працуе механізатар Андрэй Лусковіч. З другога ўкосу травы плануецца нарыхтоўваць па інтэнсіўнай тэхналогіі – у палімерную ўпакоўку – для гэтага маюцца і неабходная тэхніка, і матэрыялы.
Не марудзяць у “Чырвоным байцы” з правядзеннем іншых палявых работ, ад якіх залежыць рост культур, іх ураджайнасць. Азімыя, яравыя збожжавыя, цукровыя і сталовыя буракі своечасова былі апрацаваны неабходнымі хімпрэпаратамі. У хуткім часе плануецца правесці падкормку кукурузы. Пакуль што яе рост запаволены – і ад спякоты, і па фізіялагічных асаблівасцях. Але пасля праведзеных работ ад “царыцы палёў” чакаюць адпаведнай аддачы. Каб разлічваць у будучым на высокія надоі і прывагі жывёлы, спецыялістамі падлічана, што на адну ўмоўную галаву павінна быць нарыхтавана не менш, чым па 28 ц к.адз. Зараз маецца 8,5 ц к.адз. Аднак “зялёнае жніво” працягваецца, у ліпені распачнецца нарыхтоўка другім укосам.
Аляксандр ХАХЛОЎ.
Фота аўтара.
На верхнім здымку: ударна працуе корманарыхтоўчая брыгада – вадзіцель Юрый Кітоў, механізатары Ігар Пацыенак, Валерый Дырыкаў, Дзмітрый Аляксееў.