Падзякаваць працаўнікам ААТ “Кіраўскае райаграпрамтэхзабеспячэнне”, якія сваёй штодзённай працай уносяць уклад у развіццё аграпрамысловага комплексу раёна, прыбылі першы намеснік старшыні райвыканкама – начальнік упраўлення па сельскай гаспадарцы і харчаванні Аляксандр Кісялёў і старшыня райкама прафсаюза работнікаў АПК Віктар Ставер.

Звяртаючыся да прысутных, Аляксандр Кісялёў падкрэсліў важнасць штодзённай працы работнікаў сельгасвытворчасці, пажадаў усім моцнага здароўя, працоўных поспехаў і мірнага неба над галавой.

Ганаровай Граматай упраўлення па сельскай гаспадарцы і харчаванні была ўзнагароджана аператар жывёлагадоўчых комплексаў і механізаваных ферм Зінаіда Таркан. Дыплома райвыканкама ўдастоены трактарысты-машыністы Уладзімір Шэленгоўскі і Уладзімір Комар.
З цёплым прывітаннем звярнуўся да калектыву Віктар Ставер: “Сябры, калегі, мне заўсёды прыемна знаходзіцца сярод вас, бо шмат год таму сваю працоўную дзейнасць я пачынаў менавіта тут, у райаграпрамтэхзабеспячэнні. Радуюся вашым поспехам і дасягненням! Ганаруся тым, што прозвішчы прадстаўнікоў калектыву гучаць на мерапрыемствах раённага, абласнога і рэсубліканскага ўзроўняў. У вас ёсць годныя дасягненні, працоўныя поспехі, а самае галоўнае – людзі – калектыў, здольны якасна і своечасова выконваць важныя для раёна і дзяржавы задачы”.
Нагруднага знака “За добрасумленную працу” удастоена дыспетчар Ніна Малашкіна. Падзяка раённай арганізацыі Беларускага прафсаюза работнікаў АПК аб’яўлена вадзіцелю пагрузчыка Аляксандру Вашукевічу.

Дырэктар таварыства Лявонцій Кушавараў агучыў вынікі дзейнасці калектыву за прайшоўшы сельскагасадрчы сезон, назваў прозвішчы лепшых работнікаў, некаторым з іх уручыў Граматы за плённую працу і прафесіяналізм.

Лявонцій Ціханавіч адзначыў: “Сельскагаспадарчая праца – гэта не проста від дзейнасці, гэта лад жыцця, які патрабуе вялікай самааддачы. Мы шчыруем, не ведаючы выхадных і святаў, з раніцы і да вечара, каб на сталах у нашых суайчыннікаў былі асноўныя прадукты харчавання: хлеб, малако і мяса. Нездарма ў народзе кажуць: “У таго толькі хлеб народзіцца, хто араць не лянуецца!”. Шчыра дзякую вам за работу, працавітасць і адданасць выбранай справе!”
Старшыня прафкама таварыства Раіса Русецкая ўручыла Падзячныя лісты за актыўную працу ў прафсаюзным жыцці шэрагу прадстаўнікоў калектыву.
Музычныя падарункі працаўнікам сельгасвытворчасці падрыхтавалі работнікі галіны культуры раёна.

Яўгенія БЯЛЬКО.

Фота Максіма МІКЕШЫНА.

Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».