У першы дзень кастрычніка, які ў нашай краіне адзначаецца як Дзень пажылых людзей, наша грамадства праяўляе асаблівую ўвагу і клопат аб людзях, якія не толькі падарылі нам жыццё, але і адстаялі нашу родную Беларусь у гады Вялікай Айчыннай вайны, аднаўлялі разбураную гаспадарку, унеслі значны ўклад у станаўленне дзяржавы, неабыякавыя да лёсу сённяшняй моладзі.

Сустракаючыся з юнакамі і дзяўчатамі, прадстаўнікі старэйшага пакалення расказваюць аб сваіх ратных і баявых подзвігах, на канкрэтных прыкладах вучаць моладзь беражліва ставіцца да захавання міру, заклікаюць працягваць іх слаўныя традыцыі.
Многія пажылыя людзі — гонар нашага раёна. Сярод іх — удзельнікі Вялікай Айчыннай вайны Р.І.Куцілкін, Л.І.Манько, В.А.Буслаў, З.К.Акушэвіч, поўны кавалер ордэна Працоўнай Славы Л.Н. Палевіч, былыя кіраўнікі прадпрыемстваў і сель-гасарганізацый раёна П.У. Шчэрбіч, В.Б.Таркан, Р.З. Каган, В.В.Крэс, А.Н.Падаляк, Я.Я.Фралоў, С.Р. Груздоў, ветэраны працы П.В.Клепча, А.І.Сініцкі, В.У.Паляшчук, Г.М.Лук’янава, Л.П.Гаўрыльчык, З.Р. Галімская і іншыя. Дарэчы, многія з іх узначальваюць пярвічныя ветэранскія арганізацыі.
Мы павінны рабіць усё ад нас залежачае, каб сталыя людзі маглі перадаваць свой вопыт і веды падрастаючаму пакаленню, рэалізоўвалі свае планы, адчувалі сябе камфортна, атрымлівалі неабходныя паслугі, не заставаліся сам-насам з праблемамі.
Вядомы англійскі драматург Бернард Шоу — адзіны чалавек, удастоены Нобелеўскай прэміі ў галіне літаратуры і прэміі “Оскар” — адзначаў, што старэць — сумна, але гэта адзіны спосаб пражыць доўга. Толькі не трэба павялічваць узрост старасці, а працягваць маладосць — менавіта гэтым займаецца навука ювеналогія. Па яе градацыі, у чалавека да 30 гадоў — юнацтва, 30-60 — першая маладосць, 60-90 — другая маладосць, пасля 90 — трэцяя маладосць. Пры гэтым узрост 50-70 гадоў называецца “залатым”.
І толькі праца, здаровы лад здольныя прадоўжыць чалавеку жыццё. Кожны з нас павінен помніць аб гэтым заўсёды і не губляць аптымізму.
Людзі сталага ўзросту ўдзячны старшыні райвыканкама Аляксандру Бутараву, кіраўнікам прадпрыемстваў, арганізацый і гаспадарак раёна за ўвагу, клопат, дапамогу і падтрымку.
Нізкі паклон вам, паважаныя ветэраны вайны і працы, за багаты жыццёвы вопыт і мудрасць, якімі вы дзеліцеся з акружаючымі вас людзьмі, актыўны ўдзел у выхаванні падрастаючага пакалення. Моцнага ўсім здароўя, сямейнага дабрабыту, доўгіх гадоў жыцця пад мірным небам!
Эма КАРПУК,
старшыня
раённай арганізацыі БГА ветэранаў.