Дзеці – гэта не толькі радасць і шчасце для бацькоў, яны – аснова будучага грамадства. У хуткім часе сённяшнім хлопчыкам і дзяўчынкам давядзецца прымаць важныя рашэнні па далейшым развіцці нашай Беларусі, яны стануць прадаўжальнікамі слаўных дасягненняў старэйшых пакаленняў і захавальнікамі гісторыі свайго народа.
Дзяцінства – самы цікавы і важны перыяд у жыцці кожнага з нас. Менавіта ў маленстве фарміруецца асоба чалавека, яго погляды на навакольны свет, закладваюцца асновы характару, ідзе фізічнае і псіхалагічнае развіццё. Задача дарослых – зрабіць усё ад іх залежачае, каб дзяцінства было шчаслівым, цікавым, насычаным яркімі момантамі і падзеямі.
Яшчэ ў 1959 г. ААН прыняла Дэкларацыю па правах дзіцяці, у якую ўвайшлі артыкулы, якія заклікалі бацькоў, дзяржаўныя і мясцовыя ўлады прадпрымаць усе намаганні па абароне і захаванні правоў дзіцяці ва ўсім свеце.
Першым і асноўным міжнародна-прававым дакументам, у якім правы дзіцяці разглядаліся на ўзроўні міжнароднага права, стала Канвенцыя аб правах дзіцяці, прынятая ААН 20 лістапада 1989 года. Канвенцыю падпісала 61 краіна свету.
У Беларусі правы і законныя інтарэсы маленькіх грамадзян замацаваны ў Канстытуцыі Рэспублікі Беларусь, Кодэксе аб шлюбе і сям’і, Законе “Аб правах дзіцяці” і інш.
Міжнародны дзень абароны дзяцей – гэта не толькі радаснае свята для хлопчыкаў і дзяўчынак, але і падстава нагадаць грамадству аб неабходнасці абараняць правы дзіцяці, ствараць умовы для таго, каб яны раслі здаровымі, мелі магчымасць жыць у сем’ях, займаліся любімай справай, атрымлівалі прафесію і станавіліся дастойнымі грамадзянамі сваёй краіны.

Фота Максіма МІКЕШЫНА.