Урачыста і ўзнёсла на Кіраўшчыне адзначылі галоўнае свята краіны — Дзень Незалежнасці Рэспублікі Беларусь (Дзень Рэспублікі). Нягледзячы на крыху халаднаватае  для гэтага часу надвор’е, выдатны настрой панаваў у Кіраўску на працягу ўсяго дня.

Традыцыйна святочныя мерапрыемствы пачаліся каля Кіраўскай дзіцячай школы мастацтваў  з цырымоніі ўскладання вянкоў і кветак да брацкай магілы воінаў і партызан, загінуўшых у гады Вялікай Айчыннай вайны. 

Пад гукі марша у выкананні духавога аркестра “Фанфары Кіраўска” пад кіраўніцтвам Аляксандра Хадакова, калона дэлегацый працоўных калектываў прадпрыемстваў, арганізацый і ўстаноў раёна, арганізаваных структур грамадскіх і прафсаюзных арганізацый рушыла па вуліцы Кірава на стадыён Кіраўскай дзіцяча-юнацкай спартыўнай школы. Ва ўрачыстым картэжы на аўтамабілях у суправаджэнні эскорту — ветэраны Вялікай Айчыннай вайны.

Насычанай была праграма тэтралізаванага святочнага канцэрта “Ты — гонар і песня, мая Беларусь!” Усіх прысутных шчыра вітаў старшыня райвыканкама Аляксандр Бутараў.

Тут жа, на стадыёне, былі арганізаваны тэматычныя пляцоўкі, працавалі сельскагаспадарчыя падвор’і з арганізацыяй выстаўкі-кірмашы прадукцыі. “Калейдаскоп майстэрства” — такую агульную назву мелі выстаўкі работ майстроў дэкаратыўна-прыкладнога мастацтва, навучэнцаў школ мастацтваў, выстаўка лялек ручной работы “Лялькі маёй Кіраўшчыны”, выстаўка работ Кіраўскага Цэнтра сацыяльнага абслугоўвання насельніцтва, бодзі-арт, выступленні ўзорнай студыі “Жамчужына”, майстар-клас па пляценні кос, стварэнні прычосак “Нацыянальны каларыт” ад Цэнтра дадатковай адукацыі дзяцеі і моладзі.

Для аматараў спорту і прыхільнікаў здаровага ладу жыцця былі наладжаны спаборніцтвы па пляжным футболе, шашках, шахматах, армрэслінгу, стральбе з пнеўматычнай вінтоўкі, катанні на лыжаролерах, ролікавых каньках, падніцці гіры, скачках на скакалцы.

Супрацоўнікі Цэнтралізаванай клубнай сістэмы Кіраўскага раёна арганізавалі “Гульнявы падворак” з конкурсамі, гульнявой і забаўляльнай праграмай.

На працягу ўсяго дня ў гарадскім парку “Ля фантана” працавалі дзіцячыя атракцыёны.

Увечары святочная праграма прадоўжылася на плошчы імя С.М.Кірава канцэртнай праграмай “Песняй віншуем Беларусь”, якая завяршылася традыцыйнай рэспубліканскай акцыяй “Спяваем гімн разам”. Апагеем урачыстасцей стаў святочны феерверк, які расквеціў неба над Кіраўскам рознакаляровымі агнямі.

Больш падрабязна чытайцеў №51 “Кіраўца” да 2017 год. Вашай увазе — фотарэпартаж са святкавання Дня Незалежнасці Рэспублікі Беларусь (Дня Рэспублікі) у Кіраўску.

Фота Максіма МІКЕШЫНА.