Футбол з’явіўся ў жыцці кіраўчаніна Арцемія Дразда, які з 2017 года ўваходзіць у састаў нацыянальнай зборнай каманды Беларусі па пляжным футболе, калі яму было 6 год…

Ён расказвае: “Да нас – першаклашак СШ №1 завіталі трэнеры ДЮСШ і прапанавалі паспрабаваць сябе ў розных відах спорту. Так я ўпершыню трапіў на футбольнае поле. Гадоў да 10-11-ці наведваў трэніроўкі нерэгулярна, пазней зразумеў, што хачу займацца спортам сур’ёзна, асэнсавана. Можна сказаць, што з гэтага моманту і пачаўся мой шлях у вялікі футбол”.
Першыя трэнеры Арцемія, якіх ён паважае і цэніць, – Валерый Галомзік, Алег Новікаў і Вадзім Бокач, – навучылі яго асновам футбольнай тактыкі – забіць як мага больш галоў у вароты саперніка і як мага менш прапусціць у свае. Акрамя таго разгледзелі ў юным футбалісце патэнцыял і сумесна працавалі над удасканаленнем майстэрства, развіццём магчымасцей. Разам з Вадзімам Бокачам Арцемій зараз у саставе нацыянальнай зборнай па пляжным футболе абараняе гонар Беларусі на міжнародных спаборніцтвах. Менавіта Вадзім Мікалаевіч – так звяртаецца да былога трэнера, а зараз паплечніка па камандзе Арцемій, запрасіў яго паспрабаваць сябе ў пляжным футболе. Некаторы час Дрозд быў самым маладым футбалістам у камандзе Кіраўскай СДЮШАР.
Дзіцячае захапленне, якое з часам перарасло ў паспяховую кар’еру і стыль жыцця, падштурхнула юнака звязаць са спортам і будучую прафесію. Удзел у матчах ён спалучае з вучобай на завочным аддзяленні БДПУ імя Максіма Танка на факультэце фізічнага выхавання.
У футбольнай біяграфіі нашага суразмоўцы – гульні ў саставе маладзёжнай зборнай краіны па пляжным футболе, а таксама за клуб “Элмонт” (Расія), каманду “Гроднааблспорт” і іншыя. Зараз ён – нападаючы “СДЮШАР” (Кіраўск), удзельнічае ў XIII чэмпіянаце Беларусі па пляжным футболе. Самадысцыплінаванасць, выдатная гульня – ніводны матч не абыходзіцца без галоў аўтарства Дразда, высокі клас фізічнай падрыхтоўкі– вось, што вылучае на гульнявым полі маладога футбаліста.
8 мая Арцемію Дразду было прысвоена званне майстра спорту Рэспублікі Беларусь.
Захапленне футболам знаходзіць падтрымку з боку матулі нашага суразмоўцы – Любові, якая з’яўляецца балельшчыкам каманды “СДЮШАР” і ўважліва сочыць за гульнёй сына, а таксама жонкі Вікторыі з якой Арцемій звязаў свой лёс у агульнае сямейнае жыццё летась.
Малады чалавек адзначае: “Мне часта прыходзіцца адлучацца з дому на гульні, зборы, трэніроўкі, асабліва ў сезон – канец вясны – пачатак восені. Таму вельмі ўдзячны маім родным за падтрымку і разуменне. Надзейны тыл – аснова поспеху ў любой справе, ці то ў спорце, ці то ў кар’еры – ва ўсім!”.
Крыніца энергіі, сіл і натхнення для Арцемія – яго родныя і блізкія, таварышы, а таксама чацвераногі сябар – сабака Бруна пароды бігль.
Хлопчыкам, якія таксама мараць стаць паспяховымі футбалістамі, Арцемій Дрозд раіць не спыняцца, калі паставілі перад сабой такую мэту, пастаянна і сур’ёзна трэніравацца, не адчайвацца, калі што-небудзь будзе не атрымлівацца, і абавязкова верыць у свае сілы.
Яўгенія БЯЛЬКО.
Фота аўтара.