Выказаць словы ўдзячнасці ветэранам Вялікай Айчыннай вайны за іх подзвіг і ўшанаваць светлую памяць загінуўшых сабраліся на ўрачыстым мітынгу, прысвечаным чарговай гадавіне Вялікай Перамогі, педагогі і навучэнцы Жыліцкага сельгаскаледжа. На мерапрыемства былі запрошаны воіны-інтэрнацыяналісты Канстанцін Сімановіч і Іван Ляонаў. Удзел у мітынгу прыняў першы сакратар РК ГА “БРСМ” Алег Бойка.

Звяртаючыся да ўдзельнікаў мітынгу, вядучыя адзначылі, што час не можа сцерці з памяці ўдзячных нашчадкаў гераічны подзвіг лю­дзей, якія набліжалі Перамогу, заваявалі мір і свабоду на зямлі. У адным страі змагаліся з ворагам людзі розных нацыянальнасцей і веравызначэнняў, аб’ядноўвала іх адзіная мэта — вызва­ліць сваю Радзіму ад нямецка-фашысцкіх захопнікаў.
З прывітальным словам да сабраўшыхся звярнулася дырэктар Жыліцкага сельгаскаледжа Франя Старавойтава. Яна адзначыла, што беларускі народ у гады вайны праявіў свае найлепшыя якасці — патрыятызм, любоў і адданасць сваёй Айчыне, самаахвярнасць.
Дырэктар сельгаскале­джа павіншавала са светлым і вялікім святам — Днём Перамогі, і заклікала прадстаўнікоў маладога пакалення зрабіць усё ад іх залежачае, каб захаваць галоўныя здабыткі герояў-вызваліцеляў — свабоду і незалежнасць, каб сённяшнія ветэраны ганарыліся поспехамі моладзі як дастойнымі прадаўжальнікамі сваіх заваёў.
“У сучаснай моладзі — асаблівая адказнасць за мір на зямлі, за захаванне памяці пра гераічнае мінулае”, — з такімі словамі звярнуўся да прысутных першы сакратар РК ГА “БРСМ” Алег Бойка.
Па яго словах, маладое пакаленне павінна прыкласці ўсе намаганні, каб быць дастойным слаўных подзвігаў абаронцаў Айчыны, каб памяць аб гераічным мінулым нашага народа жыла ў вяках.
Мінутай маўчання ўдзельнікі мітынгу ўшанавалі памяць загінуўшых у гады Вялікай Айчыннай вайны. Да брацкай магілы былі ўскладзены вянкі і кветкі ад удзячных нашчадкаў.

Фота Аляксандра ХАХЛОВА.