28 чэрвеня Кіраўшчына адзначыла 75-ю гадавіну вызвалення тэрыторыі раёна ад нямецка-фашысцкіх захопнікаў. Ураджэнец в.Вілы, ветэран Вялікай Айчыннай вайны Канстанцін Фёдаравіч Баранчук, які зараз жыве ў дачкі ў г.Бабруйску, завітаў у родную вёску, каб прайсціся па яе вуліцах, успомніць пра сваё шчаслівае даваеннае дзяцінства ў акружэнні родных, мірнае пасляваеннае жыццё.

Напярэдадні дня нараджэння, якое Канстанцін Фёдаравіч адзначыў 29 чэрвеня, яму быў уручаны юбілейны медаль “75 год вызвалення Беларусі ад нямецка-фашысцкіх захопнікаў”. Павіншаваць ветэрана з ўласным днём нараджэння, з гадавінай вызвалення раёна ад нямецка-фашысцкіх захопнікаў і надыходзячым Днём Незалежнасці Рэспублікі Беларусь завіталі старшыня Баравіцкага сельвыканкама Алена Пашкевіч, школьнікі. Цудоўны настрой і музычныя нумары падарылі работнікі Баравіцкага СДК.
У сваю чаргу, Канстанцін Фёдаравіч выказаў словы ўдзячнасці за праяўленыя ўвагу і клопат, за нязгасную памяць нашчадкаў пра гераічнае мінулае абаронцаў Айчыны ў гады вайны, і заклікаў моладзь шанаваць малую радзіму, паважаць гісторыю свайго народа і прыкладаць намаганні, каб захаваць мір і свабоду сінявокай Беларусі.
Калі пачалася вайна, Канстанцін і яго аднагодкі-сябры не дасягнулі прызыўнога ўзросту. Таму разам з роднымі ён застаўся на акупіраванай немцамі тэрыторыі. Мірныя жыхары, аб’яднаўшы свае намаганні з партызанамі, як маглі, дапамагалі народным мсціўцам у барацьбе з фашыстамі.
У 1944 годзе, пасля вызвалення раёна ад нямецка-фашысцкіх захопнікаў, Канстанцін Баранчук быў прызваны ў дзеючую армію. У саставе воінаў 2-га Беларускага фронту ён вызваляў Беларусь, Польшчу, Усходнюю Прусію. Разам з баявымі таварышамі ўдзельнічаў у баях за Кёнігсберг. Памятае ветэран, наколькі жорсткай была схватка з ворагам за кожны дом, вуліцу, квартал. Камандаванне прыняло рашэнне аб узяцці Кёнігсберга штурмам. Дзякуючы праведзенай разведчыкамі рабоце і граматна распрацаванаму камандаваннем плану да вечара 10 красавіка 1945 года горад быў узяты войскамі Чырвонай Арміі. Далейшы напрамак ляжаў на Германію.
У пераможным 1945-м Канстанцін Баранчук вярнуўся на сваю малую радзіму. Захапілі былога салдата сялянскія клопаты, мірнае стваральнае жыццё. Але самае галоўнае, гэта свабодная ад ворага зямля, мір, цішыня і прыгажосць роднага краю.
Фота Максіма МІКЕШЫНА.