“З любоўю да роднай мовы”
21 лютага адзначаўся Дзень роднай мовы. Гэта не толькі свята мовы, але і роднай культуры. Вельмі хацелася, каб хаця б у гэты дзень, кожны беларус загаварыў на сваёй мове, адчуў яе прыгажосць і мілагучнасць. З гэтай нагоды кожны год у навучальнай установе Мышкавіцкай сярэдняй школе наладжваюцца розныя мерапрыемствы: вучні старэйшых класаў пішуць дыктоўку на беларускай мове, настаўнікі-моваведы падбіраюць адпаведныя тэксты на гістарычную тэму, пра выдатных асветнікаў або тэксты пра вусную народную творчасць. Малодшыя вучні удзельнічаюць у конкурсных праграмах. Ва ўстанове наладжваюць выставу да Дня роднай мовы, удзельнікі рэспубліканскага конкурсу” Буслік” узнагароджваюцца прызамі за удзел у конкурсе.
Вучні пятых класаў пад кіраўніцтвам настаўніка беларускай мовы Баршчовай Н.У. прынялі ўдзел у культуралагічнай віктарыне “Вандроўка па родным краі” на знаўца старонак гісторыі беларускага народа. У віктарыне ўдзельнічалі дзве каманды, якія выправіліся ў незвычайнае віртуальнае падарожжа па Беларусі, не выходзячы з класа. Усе прысутныя змаглі павандраваць па старонках гісторыі мовы Беларусі, а заадно паказаць, наколькі добра ведаюць родную мову і культуру. Вучні атрымалі такое заданне, як “Закончы прыказку”, тым самым дакрануліся да залацінак вуснай народнай творчасці. Неабходна было адказаць на пытанні “Хто ёсць хто”. Пры выкананні задання “Пакажы свае веды” вучні паказалі свае веда пра беларускіх паэтаў, пісьменнікаў. Адначасова пазнаёміліся з музычнымі творамі, якія суправаджалі іх у час падарожжа. Не засталіся без увагі і балельшчыкі. Для іх наладжваліся конкурсы на лепшых знаўцаў беларускай мовы. Самым цікавым быў апошні конкурс “Чорная скрыня”. Удзельнікі павінны былі разгадаць пры дапамозе загадак, што знаходзіцца ў скрыні. Акрамя гэтага, дзеці ўвачавідкі ўбачылі рэчы, якімі больш ужо не карыстаюцца, пачулі іх назву. Мерапрыемства выклікала вялікую цікавасць у дзяцей, бо ўяўнае падарожжа прынесла ім шмат новых ведаў. Пераможцаў чакалі ўзнагароды.
Баршчова Наталля, настаўнік беларускай мовы ДУА “Мышкавіцкая сярэдняя школа”.