Акцыя «Разам з мастацтвам» на Кіраўшчыне
Кіраўскі раён далучыўся да агульнарэспубліканскай акцыі «Разам з мастацтвам», якую пры падтрымцы Міністэрства культуры праводзіць Маладзёжны тэатр эстрады.
Мерапрыемства прымеркавана да святкавання 80-годдзя вызвалення Беларусі ад нямецка-фашысцкіх захопнікаў і Перамогі савецкага народа ў Вялікай Айчыннай вайне. Акцыя – гэта магчымасць расказаць аб укладзе беларускага народа, дзеячаў культуры і мастацтва ў барацьбу з ненавісным ворагам на франтах і ў тыле, ушанаваць і выказаць словы ўдзячнасці ўдзельнікам вайны і ўзгадаць продкаў-герояў.
У аграгарадку Жылічы ўдзельнікі акцыі – мастацкі кіраўнік Маладзёжнага тэатра эстрады Аляксандр Далжэўскі, заслужаны артыст Рэспублікі Беларусь Дзмітрый Сяргееў, артысты Вольга Калеснікава, Шыр, Аляксандр Варанішча, Кацярына Мядзведзева разам з моладдзю і мясцовымі жыхарамі ўсклалі кветкі да помніка-скульптуры выкладчыкам і студэнтам, загінуўшым у гады Вялікай Айчыннай вайны.
Затым госці і ўдзельнікі акцыі наведалі выставу «Генацыд: памяць і боль беларускай зямлі», прысвечаную трагічным падзеям, адбыўшымся на тэрыторыі Кіраўскага раёна ў гады вайны, а таксама пазнаёміліся з творчымі работамі выхаванцаў дзіцячых школ мастацтва г.Кіраўска і Жыліч «Мірная, моцная, прыгожая – мая Беларусь».
Прадоўжылася мерапрыемства на сцэне Жыліцкага сельскага Дома культуры.
Звяртаючыся да ўдзельнікаў акцыі, Аляксандр Далжэўскі адзначыў, што асноўная мэта і задача праекта – паказаць уклад дзеячаў культуры і мастацтва ў вызваленне краіны ад нямецка-фашысцкіх захопнікаў. Песні, вершы, творчыя кампазіцыі былі моцным стымулам для ўзняцця духу байцоў, натхнялі абаронцаў на подзвігі, усялялі веру ў Вялікую Перамогу савецкага народа ў вайне. Аб вайне ярка, кранальна і эмацыйна расказваюць не толькі дакументы і мемуары, але і мастацкая літаратура, музыка, кіно.
Па словах Аляксандра Далжэўскага, мэта акцыі “Разам з мастацтвам” – садзейнічаць патрыятычнаму выхаванню насельніцтва, прывіць павагу да гісторыі, культуры і традыцый свайго народа, крануць кожнае сэрца, асабліва маладое пакаленне, аддаць даніну павагі і памяці ўдзельнікам вайны, выкарыстоўваючы вялікую сілу мастацтва.
Загадчык сектара культуры райвыканкама Ларыса Гаўрылава адзначыла вялікі ўклад акцыі ў выхаванне падрастаючага пакалення, захаванне гістарычнай праўды і памяці аб падзеях Вялікай Айчыннай вайны.
Па яе словах, дата вызвалення Беларусі ад нямецка-фашысцкіх захопнікаў дарагая і важная для кожнага беларуса. І практычна ў кожнай сям’і ёсць гісторыя, звязаная з вайной і яе трагічнымі старонкамі. Памяць аб вайне, гераічных подзвігах беларусаў на франтах і самаадданай працы ў тыле, мільёнах загінуўшых духоўна аб’ядноўвае нашу краіну і народ.
Звяртаючыся да прысутнай у зале моладзі, Ларыса Гаўрылава адзначыла, што маладое пакаленне не павінна забывацца аб тых страшных падзеях, якія адбываліся на нашай зямлі ў гады вайны. Памятаць – значыць не дапусціць паўтарэння, зберагчы мір і незалежнасць сваёй краіны, зрабіць усё магчымае для яе далейшага развіцця і працвітання. Нам пашанцавала жыць пад мірным небам – і ў нашых руках захаваць гэты скарб.
Яскравым момантам сустрэчы стала канцэртная праграма артыстаў Маладзёжнага тэатра эстрады. Са сцэны гучалі вядомыя тэматычныя кампазіцыі ваенных гадоў, якія ў гады вайны натхнялі народ на барацьбу з ворагам. Прыемна было чуць, што прысутная ў зале моладзь падпявала артыстам, а кожны нумар быў сустрэты апладысментамі. Кіраўчане таксама падрыхтавалі творчыя выступленні.
Кранулі ўдзельнікаў акцыі і ўспаміны артыстаў аб сваіх родных, якім давялося перажыць жахі вайны, ваяваць з ворагам на франтах, вярнуцца дадому жывымі. У той вайне згуртавалася вялікая краіна, народ стаў на абарону сваёй Радзімы плячом да пляча і перамог! Пра гэты подзвіг трэба памятаць заўсёды, памятаць, дзякуючы каму мы жывем пад мірным небам. Разам ушанавалі памяць загінуўшых мінутай маўчання.
Ларыса Гаўрылава перадала Аляксандру Далжэўскаму мініяцюрную копію скульптуры «Беларусь – скорбящая мать», устаноўленай у в.Боркі. Сталічныя госці паабяцалі перадаць падарунак у Беларускі дзяржаўны музей гісторыі Вялікай Айчыннай вайны.
Пасля завяршэння канцэртнай праграмы артысты тэатра эстрады наведалі Жыліцкі гістарычны комплекс-музей.
Людміла СЯМЁНАВА.
Фота Аляксандра ХАХЛОВА.