ХV Міжнародны пленэр па кераміцы “Арт-Жыжаль” праходзіць з 12 ліпеня па 2 жніўня ў Бабруйскім раёне
ХV Міжнародны пленэр па кераміцы “Арт-Жыжаль” праходзіць з 12 ліпеня па 2 жніўня ў Бабруйскім раёне на базе адпачынку “Вербкі” ААТ “ФанДОК”. У ім прымаюць удзел прафесійныя беларускія і замежныя мастакі-керамісты з дзевяці краін — Латвіі, Літвы, Малдовы, Індыі, Францыі, ЗША, Украіны, Расіі.
Пленэр “Арт-Жыжаль” праводзіцца з 2003 года. Месцам яго дыслакацыі быў і наш раён — база адпачынку “Дом рыбака” на беразе Чыгірынскага вадасховішча.
Дэвіз творчага мерапрыемства ўсе гады застаецца нязменным: “Ад традыцый да сучаснасці праз вопыт майстэрства”.
У маляўнічых мясцінах над Бярэзінай, у адзінстве з прыродай, натхнёныя цудоўным наваколлем і ўласнай фантазіяй, ствараюць майстры свае незвычайныя вырабы з дапамогай гліны і агню. Трэба адзначыць, у Беларусі захаваўся сапраўдны старажытны працэс стварэння вырабаў з керамікі. І ён дастаткова працаёмісты. Для абпалу ўвасобленых у гліне ідэй майстроў складаюцца спецыяльныя печы (усяго тры), у якіх пры спальванні дроў павінна падтрымлівацца належная тэмпература, максімальная — 1050°С. І што атрымаецца ў выніку — вельмі хвалюючы для кожнага мастака момант…
Як падчас нашага наведвання базы “Вербкі” адзначыў адзін з арганізатараў мерапрыемства і яго ідэйны натхняльнік Валерый Калтыгін, тэма пленэра сёлета — “Флора і фаўна горада”. Кожны ўдзельнік павінен раскрыць яе ў межах абавязковага задання па вырабу аўтарскай дэкаратыўнай вазы вышынёй 1 м, а па вертыкалі яна павінна складацца з 2-3 частак. Гэтыя творчыя вырабы застануцца ў якасці падарункаў гораду Бабруйску. Па адной аўтарскай рабоце кожнага кераміста, зробленых падчас пленэра, папоўняць фонды Бабруйскага мастацкага музея.
Завяршыцца пленэр, па традыцыі, выставай “Кераміка ночы”, якая распачне работу ў Бабруйскім мастацкім музеі 2 жніўня: убачыць творы майстроў керамікі змогуць усе жадаючыя.
Наталля ХАДАКОВА.
Фота аўтара.