Кіраўскае раённае аб’яднанне арганізацый прафсаюзаў: “Дзейнічаць у інтарэсах працоўных!”
На пасяджэнні Савета раённага аб’яднання арганізацый прафсаюзаў быў разгледжаны шэраг пытанняў. Сярод асноўных — аб ходзе выканання ў раёне комплексу мер па рэалізацыі ў сістэме Федэрацыі прафсаюзаў Беларусі асноўных палажэнняў Праграмы сацыяльна-эканамічнага развіцця Беларусі на 2016-2020 гады. Былі таксама абмеркаваны вынікі праведзенага маніторынга па захаванні заканадаўства аб ахове працы ў арганізацыях раёна. Падчас урачыстай часткі адбылося ўзнагароджанне пераможцаў раённага агляду-конкурсу на лепшую пярвічную прафсаюзную арганізацыю.
Удзел у рабоце пасяджэння прыняла прадстаўнік абласнога аб’яднання прафсаюзаў Вольга Дамінікава. Амаль 50 старшынь “пярвічак” прадстаўлялі свае арганізацыі і прадпрыемствы.
Са справаздачным дакладам выступіла старшыня раённага аб’яднання прафсаюзаў Алена Глекава. Яна спыніла ўвагу прысутных на аспектах, на якія распаўсюджваецца сфера ўплыву арганізацыі. У першую чаргу, гэта абарона правоў і законных інтарэсаў працуючага чалавека. Адзначалася, што прафсаюзамі зроблена шмат чаго. Так, у Калектыўных дагаворах з’явілася больш канкрэтыкі ў дачыненні да маральнага і матэрыяльнага заахвочвання работнікаў, агавораны метады падтрымкі асобных катэгорый, напрыклад, маладых спецыялістаў. Прафсаюзы імкнуцца асаблівую ўвагу надаваць кантролю за выкананнем наймальнікамі заканадаўства аб працы і ахове працы. Напрыклад, у бягучым годзе ў нашым раёне не было выпадкаў затрымкі заработнай платы ці яе нявыплаты.
Алена Глекава адзначыла, што раённая ўлада заўсёды ідзе насустрач прафсаюзным ініцыятывам. У сваю чаргу, раённае аб’яднанне садзейнічае вырашэнню праблемных пытанняў паміж работнікамі і наймальнікамі. У сувязі з правядзеннем аптымізацыі ў арганізацыях і на прадпрыемствах на пастаянным кантролі прафсаюзаў знаходзяцца пытанні працаўладкавання вызваленых работнікаў. Прадстаўнікі прафсаюзаў кантралююць захаванне норм і становішча раённага пагаднення і калектыўных дагавораў у частцы прадастаўлення дадатковых правоў і гарантый работнікам.
Старшыня раённага аб’яднання прафсаюзаў давяла да ведама прысутных вынікі мініторынгу па захаванні заканадаўства аб ахове працы ў арганізацыях раёна. Як адзначалася, рэйдавай групай на правераных аб’ектах было выяўлена 47 парушэнняў. 18 з іх былі тэрмінова выпраўлены, астатнія знаходзяцца пад кантролем членаў камісіі па прафілактыцы вытворчага траўматызму.
У сувязі з тым, што некаторыя члены Савета раённага аб’яднання прафсаюзаў больш не з’яўляюцца старшынямі пярвічных прафсаюзных арганізацый, было прынята рашэнне аб ўнясенні змяненняў і дапаўненняў у састаў Савета. Дадзеная працэдура была праведзена шляхам адкрытага галасавання.
На пасяджэнні Савета было закранута шмат важных пытанняў, вызначыны прыярытэты на будучыню.
Напрыканцы пасяджэння былі агучаны вынікі раённага агляду-конкурсу на лепшую пярвічную прафсаюзную арганізацыю. Першае месца заняла пярвічная прафсаюзная арганізацыя раённай бальніцы (старшыня прафкама Алег Дворкін), другое — Паўлавіцкай СШ імя Р.А.Худалеева (старшыня Ефрасіння Масюковіч), трэцяе месца — РЦСАН. Старшыні і прадстаўнікі пярвічных арганізацый былі ўзнагароджаны дыпломамі.
***
Агульная колькасць членаў прафсаюза раёнаскладае 6146 чалавек. Самым масавым з’яўляецца раённы камітэт прафсаюза работнікаў АПК — 3129 членаў. Прафсаюзны камітэт работнікаў адукацыі і навукі налічвае 958 членаў (25 пярвічак). У арганізацыях і на прадпрыемствах раёна грамадскую работу ажыццяўляюць 302 грамадскіх інспектары.
Людміла СЯМЁНАВА.
Фота аўтара.